喺外圍同本地市場資金欠奉下，好多投資者高掛免戰牌，搞到個市喺應該反彈嘅時候，點推都升唔起，即使日本政府用入市呢一招嚟推高日本股市，港股都重係照跌可也。
喺咁嘅情況下，有幾個睇淡後市嘅行家，好似中咗獎咁周圍同人講後市重會點衰點折墮，呢啲將自己成就感建築喺人哋痛苦身上嘅人真係唔要得。
今年雖然係雞馬相沖，但似乎同雞有關嘅行業又衰唔得好多，點解伏勝會咁講？皆因喺內地開設養雞場嘅卜蜂（043）唔單止半年賺咗4700幾萬美元，重有消息話佢哋同黃老太間超市已傾掂晒，只係等港府首肯，咁就可以源源不絕咁將啲冰鮮雞交落嚟香港，到時唔憂無生意，所以叫大家留意留意。
消息話隻股應該可以去到5毫，不過伏勝始終覺得喺個市無乜新錢到之前，千祈唔好咁博，況且隻股仔已經喺今年低位一毫升到三毫，應該係時候歇一歇。
提起個市冇錢，不但影響成交額，就連多隻喺早前走勢強勁嘅民企股都頂唔順要舉手投降，就以禮拜四而言，多隻民企股嘅單日跌幅超過一成，當中連勁賺錢嘅大成生化（809）都走唔甩。呢批股份之所以跌得咁急，除咗證監叫停咗隻歐亞農業（932）之外，話說原來朱總話過國內十大富豪冇個交足稅，要嚴懲漏稅活動所致，嚇到班原本負責操刀嘅舵手大失預算，加埋隻歐亞俾證監整停咗後，銀行即刻停晒呢啲民企嘅Line，結果大小戶都眼白白睇住啲價跌但又做唔到嘢，有啲行家同伏勝講，最好唔好掂呢啲民企住，小心重會有大鑊嘢未爆。
伏勝