阿寶具有多重角色，牠是一隻白冠葵花鸚鵡，又是小主人Jessica的嫁妝，但牠最重要的角色還是Jessica的摯友。大家最關心阿寶會說幾多句說話，能夠逗得小主人這麼疼錫牠，筆者和他們相處了兩日，發覺只會說Hello的阿寶，征服Jessica芳心的秘訣，在於牠懂得看眉頭眼額，在小主人需要牠時往往及時出現，分享Jessica的哀與樂，他們之間的感情來得直接、來得單純，一切盡在不言中，就等Jessica同我哋分享一下與阿寶的種種趣事。
記者：陸伊琳
攝影：陳穎、楊錦文
鳴謝：鸚鵡店（29446012）
我屋企共養了九隻雀仔、一隻龍貓及一隻北京狗。雀仔種類包括：兩隻白冠葵花鸚鵡、一對愛情鳥、一隻太陽鸚鵡、一隻黃頸鸚鵡、一隻葵花鸚鵡、一隻鷹頭鸚鵡及一隻彩鳳，媽咪形容我係一個馴獸師，事關好多脾氣差嘅狗仔及小動物落到我手中都會變得溫純，所以屋企上上下下嘅寵物都交由我打理。芸芸寵物中我最錫白冠葵花鸚鵡阿寶，我同佢嘅緣份，喺我十歲生日開始。
生日當天，舉家陪我到鸚鵡店進行「相睇」，原本諗住買一隻葵花鸚鵡，點知對呢隻白冠葵花鸚鵡一見鍾情。第一次見面，佢已經好嗲我，就算我點舞佢，佢都唔發脾氣，結果佢就成為我嘅生日禮物，即場替牠命名為阿寶，意指寶貝之意。媽咪更笑言，鸚鵡有五、六十歲命，阿寶除了是生日禮物外，亦是我的未來嫁妝㖭！
自從阿寶成為家裏的新成員後，我花在牠身上的時間明顯比其他雀鳥多，後來怕牠悶，便替牠物色對象，買了一隻雌性的白冠葵花鸚鵡阿珠回家陪佢。最令我感到驚訝的，是阿寶並沒有因而重色輕友，反而很多時都會冷落阿珠，經常陪住我。雖然佢係動物，但我覺得佢同其他雀仔真係好唔同，我和牠好像很有默契，大家是好朋友一樣。
每當遇到開心或不開心的事情，我都會搵阿寶傾訴，雖然牠不會像人般懂得對話回應，但從牠的眼神及依偎，已感覺到牠是明白我的，這已經非常足夠。佢亦係我讀書的推動力，因為快快溫習完就可以同佢玩，甚至一齊行街街。每當我午睡時，阿寶亦會自動自覺乖乖地瞓係我左右，佢真係好乖㗎！
平日喺屋企，我一得閒就同阿寶玩，最鍾意訓練佢玩倒豎葱，佢亦十分受落，我夠膽話，我和阿寶絕對是最佳拍檔，用呼拉圈玩倒豎葱，很少失手！
同阿寶相處，其實有很多難忘事，覺得最好笑的，係佢原來好驚一架粉紅色的米奇老鼠玩具車，每當攞住呢架車，佢都會嚇到羽毛豎起晒，我試過用其他車仔嚇佢，佢都無反應，有時我會專登用呢架車嚇佢，每次見到佢個儍樣，都會覺得好好笑！
小記採訪呢對小姊妹兩日，發覺佢哋同鸚鵡相處之道真係與別不同，唔係親眼見到，真係講都唔信！每日做完功課後，佢哋都會同鸚鵡落街玩，今日重一齊玩板車㖭！兩隻鸚鵡完全唔用腳鏈鎖住，見佢哋玩板車飛嚟飛去，鸚鵡就氣定神閒企喺車頭，板車一停，重會尖叫拍翼，嚷着要繼續玩，十足十兩姊弟般，真係歎為觀止。
我只得五歲，媽咪吩咐我負責小鳥部，照顧較細型的雀仔，我旗下有兩隻雀仔。一隻是常見的彩鳳DoDo，鳥如其名鍾意唱歌，佢非常聽我話，放喺手指仔上都唔會飛走；第二隻係新成員鷹頭鸚鵡BB關二哥，佢喺香港十分罕有，由於關二哥只有三個月大，所以由媽咪及家姐協助照料，到佢大啲，我就會開始訓練佢。
鷹頭鸚鵡，顧名思義其頭上的羽毛豎起，貌似一隻小鷹，其原產地是巴西。家養的鸚鵡多是人工繁殖，牠們較易訓練。鷹頭鸚鵡是近一年才開始人工繁殖的，故出產不多，所以非常罕有，全香港大約只有十隻，價錢也比較昂貴。
身長：約30cm
平均壽命：40年
說話能力：＊
智力：＊＊
售價：約$12,000
鳥籠：
鸚鵡很多嘴，阿寶和阿珠就經常用口自行咬開鳥籠的閘飛出來，所以要選購較堅固的鳥籠，而寬敞和較大的鳥籠均有助鸚鵡健康地成長，一個18×18吋的鳥籠，一般約售$350。為免滋生細菌，鳥籠應每星期消毒一次。
食物：
如果好似阿寶和阿珠已有十多個月大的話，便可餵飼生果糧，一日一至兩餐已足夠，呢款Hagen維他命生果糧深受鸚鵡歡迎，4磅約售$128。畀個貼士大家，千萬不要餵飼太多葵花瓜子，因其油質重，長期進食會有損健康。
沖涼：
應每星期一次，簡便些可用花灑連籠一起沖洗。沖涼後曬太陽或用風筒吹乾羽毛。