余文樂（阿樂）前晚同黃又南接受now.com訪問，諗住同網友傾吓偈，點知啲網友係咁爆阿樂以前讀邊間學校。問佢驚唔驚俾人起底？阿樂就好輕鬆咁話：「我又冇行差踏錯，最多係話我讀書成績唔好啫。」跟住有網友叫佢「收皮」，但阿樂話電腦上面啲字細到佢睇唔到，而且呢個世界梗係有人鍾意有人唔鍾意，佢亦唔介意人哋中傷佢。
講多幾講，阿樂就自己轉話題，自爆前日下晝去澳門探訪完獨居老人之後，想買豬肉乾同牛肉乾返香港做手信，點知失驚無神有個女人走埋去佢身邊，蹺住佢隻手，然後遞部相機畀阿樂個助手叫佢影相。
但當阿樂企定定準備影相嘅時候，個女人忽然連摑阿樂幾巴，猛叫阿樂「精神啲」，嚇到阿樂死死吓，一影完相之後，即刻九秒九飛奔離開，連手信都唔敢買。
名模Rosemary同媽咪前晚去咗會展睇《末路驕陽》嘅首映，但一見記者就一支箭咁衝咗入戲院，而白姐姐白韻琴就好合作，主動同記者講話好留意謝霆鋒涉嫌妨礙司法公正被起訴單官司，因為佢覺得霆鋒同四哥（謝賢）兩仔爺都好有型。
白姐姐重話同蘇永康喺台灣食搖頭丸單嘢比起上嚟，霆鋒唔難睇，但蘇永康就好難睇，問佢點解，白姐姐話冇得解，總之靚仔大晒喎！馮仁昭以為啲妹妹仔先至會唔理黑白一樣支持偶像，估唔到連白姐姐都係。
鄭伊健、車婉婉同廖碧儀噚日去銅鑼灣宣傳電影《我老婆唔夠秤》，大會安排咗五個十四歲以下嘅女fans，畀伊健選出一個唔夠秤嘅老婆。
之前有報道話張栢芝爭做賀歲片女主角，令梁詠琪慘被飛出局，伊健噚日話：「我由頭到尾唔知呢件事，咁樣講會影響栢芝做嘢，拍電影梗係愈多人愈好，最緊要做好自己，交足功課。」
前晚AmandaStrang同蔡慧敏喺中環出席喜力「Found@Thirst」DJ比賽。最近有人話Danielle搶咗Amanda男友吳繩芬，不過Amanda就否認話：「有關嗰個男人嘅事我都唔再關心，我係同佢拍過拖，但因為性格不合，已經分咗手幾個月，佢𠵱家鍾意做乜就做乜。」Amanda講得真係灑脫，馮仁昭希望佢做得到啦！
噚日中秋佳節，患咗肝癌嘅羅文（籮記）同助手阿東、前助手Terry等幾位好友，一齊喺屋企食一品窩慶祝。噚日Terry買咗靈芝畀籮記補身，而阿東就買咗張新嘅藤椅畀籮記，真係細心。馮仁昭問阿東，籮記會唔會上天台賞月，阿東就故作神秘咁講：「唔話你知。」不過，阿東話籮記都有食月餅應吓節，佢最鍾意食雙黃蓮蓉喎！
邱澤、何潤東同陳怡蓉等，前晚喺銅鑼灣出席亞視外購劇《雪地裡的星星》嘅首播儀式，台灣藝人邱澤重唱咗套劇嘅主題曲。起初全場都以為邱澤唱現場唱得幾好，點知當佢唱到一半，音樂同佢把聲都一齊停晒，邱澤喺台上就好尷尬。原來佢一直咪嘴，咁啱嗰時部機壞咗。其實如果歌手唱功有番咁上下，有自信唱現場就唔會出現呢啲尷尬情況啦！
咪以為愛美神女星皮光肉滑，一定係天生麗質，其實佢都係靠後天培養，最近馮仁昭聽個朋友講，原來愛美神成日去中環搵一個姓江嘅皮膚科醫生，除咗去睇皮膚之外，重磨埋皮，其實愛美神又唔係三十幾四十歲，好心佢就唔好咁早去搞啲咁嘅嘢，二十幾歲女就開始磨皮，幾時磨到四、五十歲喎！
外籍女模因為樣貌清純又靚女，一出道已經好引人注目，本來人人都睇好佢，點知佢發展得唔係咁順利，𠵱家得閒去吓ball先有得見吓報，其餘時間就晚晚去蒲。點解搞到咁？原來外籍女模份人好寸，重係是非精一名，咁又點會襟撈？咁都唔算衰，最慘係佢鍾意晚晚high嘢，大癮到打白粉針，佢有次喺間disco度high到迷迷糊糊，不省人事，俾三個猛男拖咗入房，但佢竟然全冇知覺，後來佢男友知道後，即刻飛咗佢，但佢重唔醒覺，到𠵱家都唔識自愛。
郭富城噚日喺尖沙嘴嘅舒適堡舉行唱片簽名會，講開有雜誌話佢新碟唔賣得，所以要返無綫拍劇力挽人氣。城城話自己份人睇得開，重話愈負面嘅新聞就愈可以顯出自己嘅地位，佢話：「最緊要自己要有信心，佢哋想打擊我嘅，梗係會侮辱我㗎！」馮仁昭覺得人有自信係好事，但係有時都要睇吓事實係點嘅！