現年二十二歲的葉璇，因參加「國際華裔小姐選舉」而晉身娛樂圈，入行只有三年的她，緋聞卻是傳個不完，在與陳浩民的緋聞告一段落後，最近又盛傳她在拍攝新劇時向吳鎮宇放「生電」，葉璇呼冤之餘，更自爆舊愛是讀哈佛的魅力男生。
《愛情篇》
葉璇入行短短三年多，緋聞卻多姿多采，先後跟陳浩民和辰達永安集團前副主席陳若磐等傳緋聞，近日亦盛傳葉璇在日本拍攝無綫新劇《衝上雲霄》外景時，向吳鎮宇大放「生電」。
對於多宗緋聞，葉璇表示有冤無路訴。葉璇逐一品評她的緋聞男友，她說：「我覺得浩民係一個心地好善良嘅人，我同佢傾到偈，不過佢大過我好多，我哋係冇機會發展嘅，亦有可能佢會嫌棄我呢個小妹妹。佢都好關心我，尤其係我哋一齊俾傳媒寫過緋聞，都算共過患難，所以友情會更深。」
而陳若磐是葉璇在公開場合認識的朋友，葉璇說：「我哋已經好耐冇聯絡，所以對佢嘅印象都十分模糊。」
葉璇又首度談戀愛史，她說：「喺我未入行，重喺美國讀大學時，我識咗一個讀哈佛大學嘅魅力男生，佢都算係校內嘅風頭躉，我哋一齊嘅時候都好開心。不過冇耐我就嚟咗香港發展，我同佢嘅感情亦不了了之。」
事業和愛情，葉璇當年選擇了前者，現在回想起來，她說：「我都試過後悔㗎，我冇再同佢聯絡啦，因為大家相隔太遠，感情好難維繫。」
問到葉璇的擇偶條件，她說：「我好欣賞啲男士好叻同埋有上進心，我希望可以喺三十歲之前結婚。但係我相信緣份，要嚟嘅就會嚟，阻都阻唔到嘅。」