上個禮拜五上晝，教統局局長李國章陪阿媽去參加前臨時立法會議員鄭明訓母親嘅追思禮。雖然追思禮地點係中環聖約翰座堂，喺正李局長上班嘅政府總部隔壁，但相信佢都要請半日假，否則為盡孝道擔上「蛇王」罪名就唔好啦！
李局長近日為使唔使重設升中試，俾家長老師迫到氣都冇得唞；嗰日偷得浮生半日閒，心情大靚，見到啲老友，重大大聲同人講：「都係做校長開心！」慌死人唔知佢懷念做中大校長嘅日子咁。
咁又係嘅，做官要面對咁多公眾壓力，成日俾人抦，一個唔小心容乜易好似馬時亨咁變成箭靶，點似做校長咁逍遙自在吖！怪唔得李局長成日唔捨得搬出中大校長官邸囉。
李局長話𠵱家都未搵到近新辦公嘅心水樓。睇嚟李局長要求都幾高；如果各位讀者有筍盤，就話聲畀李局長知，否則再喺中大住落去，八方怕接任嘅金耀基校長會同李國章反面迫遷㖭。
傳真︰2623-9278
電郵︰