在酒會上碰到賓架C，講起銀行賺錢術，佢話好彩三年前已經睇到銀行貸款再唔會係利潤增長之源，必須走第二條路，所以致力開發理財產品，開闢feeincome（收費）。三年有成，銀行界利潤日益微薄之際，賓架C就靠理財產品嘅收入維持到利潤，算佢好嘢。
賓架C話：「其實我哋已經好克己。暑假時，送女到美國小鎮入大學，成個鎮只得一間大銀行嘅分行，就係美國銀行，同個女走入去開戶口，啲職員做事好慢，但好好耐性，逐樣向我哋解釋，解釋乜嘢呢？就係開支票超過幾多張就要收費，邊樣服務要收費，總之收費項目多籮籮。如果響香港，實俾消委會將軍都似，但如果我哋可以照辦煮碗，會賺多唔少錢！」
美國啲銀行的確採用「用者自付」嘅原則，收費項目多，但一啲支票戶口可以畀利息，少開支票之人有着數。賓架C幾鍾意佢嘅千金讀嘅大學，皆因學校學生人數少，每班二十人唔夠，教授認得晒啲學生，邊個唔上堂，教授會打電話去宿舍捉學生起床，佢個女唔食早餐，俾教授知道，捉住佢去canteen食早餐，重為佢補番一啲lecture。教授學生如此親善，喺大學校簡直聞所未聞；馬主H個肥仔間大學，學生四萬人，上必修科，一班人數超過兩百，上堂好似去戲院。當然，要一流服務，就要畀錢，賓架C畀嘅學雜費，多過馬主H好多。