八方有個IQ題考考大家：警察阿明話佢有個細佬叫阿強，但係呢位阿強就話，佢冇一個做警察嘅大佬，點解呢？諗到未？答案稍後先講，如果閣下諗極都諗唔到，你就係平機會所謂嘅「定型舊人類」。
所謂「定型舊人類」，就係嗰啲假設某類人喺社會上注定要扮演某種角色嘅人。平等機會委員會話，定型觀念令人局限自己嘅工作同人生選擇，無法盡展潛能，都幾悲涼。所以平機會發起「無定型新人類」計劃，請嚟十一位傑出人士當半日導師，帶住一百個中二至中三嘅學生返工，幫佢哋了解吓社會上各種工作嘅實況，認清楚好多工作崗位，男又得、女又得，殘疾都得。呢個計劃吸引了四百幾個學生參加，大會揀咗一百個。
導師方面陣容鼎盛，有女導演張婉婷、失明港大物理系教授馮漢源、瑪麗醫院急症部男護士長羅偉強、一度失聰嘅藝人羅慧娟、女指揮家葉詠詩、重有三大政界女強人范徐麗泰、余若薇、劉慧卿等等。平機會希望可以俾後生仔女日後選科同就業一個借鏡。
至於條IQ題嘅答案就係：阿明係阿強嘅家姐嘛！
傳真︰2623-9278
電郵︰