最近埃及金字塔用上一部小型探測車，去發掘墓室內秘道盡頭嘅神秘空間；其實呢種機械人式嘅探測車技術，最近亦已引進本港，而且重可以稱得上係一部萬能探測車，用以探測渠道，方便工人進行工程㗎。
千祈唔好睇小呢部萬能探測車，佢嘅淨重約65kg，呢個重量可使輪胎緊貼路面，兼且有助車身穩定；不過要控制呢部小車，就要用上兩部電腦同一部後勤車，而後勤車嘅設備包括有發電機、探測車升降台，以及自動收發鋼纜系統等等，所有設備約值130萬元。
另外，呢部探測車用上「大腳八」設計，可有助增強行車穩定性外，而且重可以行走一啲崎嶇嘅路面；而此車更備有防爆、防水同防火功能，以確保執行任務時安全無誤。同時更備有高解像度攝錄鏡頭及射燈，可於低光度環境下操作，並將所拍攝得到嘅影像，傳送到後勤車輛嘅電腦上，以便工作人員進行渠務探測工作㗎！