美股8000關失守，恒指重可守得住9000關，都算港股硬凈。其實港股將要面對中國電信數以百億元嘅抽水大計，盈富基金（2800）發售60億元，及渣打數十億元之配售計劃，恒指要跌穿9000真係好容易。
不過，現時距離期指結算重有一段時間，所以大戶重未發難，相信下個禮拜尾段，淡友儲夠彈藥就會展開新一輪攻勢，估計仍會重點攻擊中移動（941）、聯通（762）、和黃（013）及滙豐（005），淡友就算唔能夠將大市大幅壓低，好友亦難以再大挾淡倉，因為大家都知道，除非布殊轉死性，否則美伊呢一仗係打硬，油價必然高企，經濟難免受損。
最近地產商頻頻劈價促銷樓盤，雖然不少外資基金已將地產股減持得七七八八，不過在地產股前景欠佳嘅情況下，據聞有基金想連倉底貨都沽埋。黑客話，呢類基金一直持貨觀望，睇吓政府會否有新措施挽救樓市，可惜現時佢哋已經對政府冇晒信心，不再存以厚望。
少年民企話事人周益明，以每股0.417元全面收購聯大集團（346）後，聯大股價本來一直企於0.80元水平，不過在9月16日無端端大跌至0.48元，其後再跌至0.40元，結果唔少人接受佢嘅收購建議，周益明持股量升至80.65%，不符公眾持股量25%之最低要求，周氏需要批售聯大最少1131萬股。
此股現時大部份貨源已落入自己友手上，可以隨時開車挾上批股。不過，民企投資氣氛仍然差勁，要在呢個時候做嘢，幕後人士非財力強大不可。
阿 虎