謝霆鋒昨日繼續為被控串謀妨礙司法公正案出庭，今日則因中秋節公眾假期而休庭。以往並無節日觀念的謝賢，昨表示今日應會跟前妻拉姑一起到霆鋒家吃飯過節，共慶團圓，不過拉姑卻說：「過咗先算，過咗就一家團圓！」
今日是一年一度的中秋節，但今年的中秋佳節對謝霆鋒來說，卻有特別意義。霆鋒連日都要為被控串謀妨礙司法公正案出庭應訊，但適逢今、明兩天都休庭，要待後天才再開審，故霆鋒今日可與家人共賀中秋，享天倫之樂。
霆鋒昨日繼續在父親謝賢（四哥）和母親狄波拉（拉姑）陪同下，到西區裁判法院應訊，昨日只審了半天，下午休庭，霆鋒到灣仔午膳後便返家休息。
記者昨日致電問拉姑中秋節一家團圓的日子會怎過，她無奈地說：「過咗先算，過咗就一家團圓！」
而四哥則在電話中說：「我從來都冇乜節日觀念，所以都唔會預早計劃好點去慶祝。但我聽日應該會同拉姑上去霆鋒屋企過節，因為有狗仔隊跟出跟入，我哋都去唔到外邊食飯。」
留在霆鋒家中，晚餐會由誰下廚？四哥說：「我哋或者叫外賣，到時睇吓霆鋒想食乜咪叫乜。如果拉姑肯落廚都可以買啲餸煮嘅，總之一切到時先算。」
四哥曾透露霆鋒在今年父親節時，留在家中陪他打麻雀，不知今晚四哥、拉姑和霆鋒一家三口留在家中過節，可會多找一位友人乘機打番幾圈麻雀？四哥昨日說：「真係乜都未知，到時先算。」
四哥又表示過往的中秋節，都沒有特別為兒子霆鋒和女兒婷婷買燈籠和月餅，他說：「講真吖，我從來唔做呢啲嘢，所以咁耐以嚟，我真係唔清楚霆鋒鍾意食邊種月餅。」
霆鋒自從被控串謀妨礙司法公正以來，成為傳媒追訪對象，四哥坦言十分擔心，他說：「所以我希望狗仔隊可以喺大節當前齊齊放假，佢哋一日跟住霆鋒，都會搞到佢雞飛狗走。」四哥更笑言希望記者將焦點放在他身上，他鬼馬地說：「我都可以拖幾位靚女過節，要迎月都唔使等邊日，我日日都有月賞㗎啦。」
此外，污點證人成國定日前作供時，聲稱自己在案發後被帶返警署期間曾致電霆鋒，主控官便要求成國定確認霆鋒的手機號碼，成國定即場說出「910190XX」。由於有霆鋒歌迷於庭上旁聽，亦有報章將其號碼全部刊登，令霆鋒的手機號碼被公開。
其實霆鋒目前仍沿用該電話號碼，昨日記者致電霆鋒時，他已將電話接駁到傳呼台，相信霆鋒是因為被人call爆機所以不接電話。
採訪：比華利
攝影：林德雄、娛樂突發組