歐亞農業（932）前日停牌，波及大部份民企股，好彩噚日好多民企都出現反彈，雖然好多人估計反彈唔會持久，但聽聞有個別水頭充足嘅民企，可能進行回購支持股價，對唔沽貨仍然捧場嘅基金有所交代。
經紀陳話，傳聞其中一隻會進行回購嘅民企係中國稀土（769），隻股前日公布業績盈利急跌52%，加上受歐亞停牌所累，令到股價急跌接近16%，但噚日午市已經企穩，微升2.63%，收78仙。
小初記得在民企股未熱炒，中國稀土未改名仍叫宜興新威之時，股價長期企在70仙水平，收尾隻股終於獲得外資基金賞識，股價最高炒過去3元樓上，公司趁高批股集資，抽嘅水重多過上市集資所得。
隻股現時嘅股價，真係還原基本步，既然市旺時曾經成功抽過水，家陣低位回購，支持吓股價又何妨？不過要隻股重返以往高位，恐怕都有排等，有間外資行估計，中國稀土能夠見番1元已經唔錯。
慕容小初