以進口西式食品為主嘅Great，由今日起至十月三日，一連兩個星期會舉辦日本食品節，除有嚟自日本8個縣市逾千款嘅食品外，更有由日本福岡縣當地傳統廣告宣傳嘅始祖─“Chin-donYa”表演隊伍作助興。今日係中秋佳節，咁難得機會有表演睇，未有慶祝節目，不妨到此逛逛，一家大細可寓購物於娛樂，熱鬧氣氛，定必令大家留連忘返。
記者：陳冰麗 攝影：黃子偉 ImageGirl：Maggie
地址：金鐘太古廣場LG1
“Chin-donYa”（亦作“Chin-don”表演者），起源於百多年前江戶時代末期至昭和時代初期。最初係日本作為傳統廣告宣傳表演模式，現今已成為一項著名嘅娛樂事業。
“Chin-donYa”表演者大多數以奇裝異服或封建時代嘅裝扮為主，使用一種特製嘅樂器名為“Chin-don（太鼓）”，由一個「鑼」及一個「鼓」組成，“Chin”就係「鑼」聲，而“Don”就係「鼓」聲；將組樂器負在胸腹前面，就係要方便表演者可邊行邊演奏。
（左）田中理惠子RiekoTanaka：
擅長打太鼓配合“Chin-donYa”樂曲演奏
（中）安達英明HideakiAdachi：
擅長“Chin-don太鼓”樂器演奏
（右）永島幸代YukiyoNagashima：
擅長吹喇叭配合“Chin-donYa”演出
日本美食節部份食品更係首次引入本港，其中有我小記嘅心水推介，來自櫪木縣罕有嘅「罐裝麫包」。聽講罐裝麫包源自九五年神戶發生地震後，人們想出來嘅一種保持麫包鬆軟方法。就咁睇呢種麫包有啲似蛋糕，但其實佢一嚿麫包經烤焗過後，再以特製嘅罐封實，食嘅時候仍有新鮮及鬆軟感。有提子乾、香蕉、奶油、朱古力及士多啤梨五種口味供選擇。小記認為，罐裝麫包方便於攜帶，唔怕壓扁，外出袋一罐喺身，肚餓隨時有鬆軟麫包食。
「那須」係日本櫪木縣一個出名嘅度假勝地，「月」之類嘅製品就係西式蒸蛋糕嘅統稱。呢種蛋糕由鬆軟嘅麵糰做外層，包住軟滑嘅黃色乳蛋，食落軟滑，甜度適中。根據統計，「那須之月」係遊客到櫪木縣買手信嘅首選，曾獲「全國菓子大博覽會」金獎狀，作為送禮就夠得體。
「羽二重餅」個樣有啲似港產香蕉糕，但較軟滑及無咁甜。呢種甜糕點構思源自福井縣一種絲織品，取其柔軟、高雅嘅概念，於1902年創製出呢種糕點，「羽二重餅」更被喻為一種矜貴而又能登上大雅之堂嘅甜糕，大家可要試真啲。每盒內有八小包獨立包裝甜糕，每包分別有兩件。
沖繩除咗黑糖聞名之外，呢款茶飲亦係當地另一特產，本港暫時好少見到有呢款茶飲賣。其茶味濃郁帶清香，雪凍飲更覺清爽涼快。今晚係中秋佳節，佢係方便之選，可用佢作為食月餅後消滯良品。
據講日本嘅青檸前身係由一位中國和尚帶過去，再喺大分縣培植，地理環境因素，種植園位於海拔300-350米嘅竹田市，當地嘅氣候及水質令種出嘅青檸零舍香及多汁。「青檸之秘蜜」係一款加有蜜糖嘅濃縮果汁飲品，可直接加入水拌飲或混入雞尾酒中，令味道更清香，雪凍做雪葩又得，今日食月餅，又可以之佐飲助消化。
講到北海道，不期然會令人想起富良野嘅薰衣草及函館嘅牛乳。今次嘅日本食品節，就引入以上兩種食品所做成嘅糖果，其中嘅薰衣草糖果更係首次喺本港出售，非常罕有，鍾意薰衣草，又豈可放過呢？用薰衣草做成嘅糖果，入口帶清香；而牛乳糖果則奶味濃郁，兩者同時都好軟滑，甜度適中。
呢款咁的骰嘅食品係京都特產之一，睇得之餘，重食得及飲得。外層係香脆嘅燒餅，可以食得。內裏則係一啲粉物，用作沖水飲，分別有抹茶、紅豆及葛湯粉，全部帶甜味，各有特色。賣相別致嘅喜仙詩菓子，用作送禮，包裝都可以慳番。
鍾意有口感嘅則可試試呢款日式闊麫，佢係大分縣家鄉食品，特別混入咗青檸汁做成，食法多元化，作為意大利闊麫烹調或放湯食用均可。圖左嘅一款係麫豉湯底，味較濃郁，圖右則係以黃豆粉做成嘅湯底，味帶清香。
加子母村位於岐阜縣內其中一個村落，當地盛產檜木樹，就地取材關係，當地人就利用檜木樹榨汁後混入麫粉內製成呢種充滿風土味嘅特色素麫。呢種麫色澤帶綠，麫身幼細，作為拌食用最佳，幼滑可口。