男仔好打機，女仔愛唱K，似乎係香港時下一代嘅主流玩意，至少馬主H嘅觀察係咁。當然，凡事總有例外，亦有人唔打機唔唱K嘅，不過恐怕係少數。最近中大迎新事件，俾傳媒煲大咗，一啲大學生不以為然。馬主H個肥仔嘅同學讀緊理大，佢話：「今年中大唔夠運啫，出年或者輪到我哋俾人唱呢？」佢哋視作當然嘅事，傳媒視為怪事，係唔係有代溝呢？正如馮禮慈（中大畢業生）喺《星島日報》專欄話：「《壹本便利》贏了校園（大意如此），講明迎新事件乃係《壹本便利》文化，大學生愛讀《壹本便利》就有如此行為，一啲都唔出奇。成年人重迷戀佢哋讀書時候董橋做《明報月刊》總編輯嘅年代，真係既老餅又out晒！」
昔日有云：「不讀詩，無以言」。今日馬主H個肥仔話「不打機，無以言」，皆因唔講打機，青年人就缺乏共同語言，李國章局長、羅范椒芬秘書長都係英美名校學生，對呢個香港問題，不知有何認識？如何解決？馬主H唔認為政府可以解決問題，一於用盡方法引誘肥仔讀書，往樂觀處想，其中一個方法就係踢佢去外邊讀書，接受衝擊。肥仔去到東京，與一班歐美台韓學生讀日文，閒談之間，一位歐洲大學生話：「我最鍾意聽MilesDavis」，其他學生齊齊拍手叫好。肥仔話：「邊個叫做MilesDavis？我只識LAClippers嗰位DariusMiles！」台韓學生笑佢冇文化，歐洲學生重話：「呢個星球嘅人，人人識得MilesDavis！」肥仔惟有去紀伊國屋買CD，叫做上了一課。