美股又唔妥，港股早段又一鋪，恒指最慘之時得番9210，收9328，低位反彈118點，全日埋單跌幅唔夠100點，暫時睇住9000心理關口守唔守得住。
9月季結就到，但唔係基金股必然有Windowdressing活動。利豐（494）散50仙，收7.20元，是去年10月底以來低位。美股有問題，美國出口股難以威威，利豐高PE（26.4倍）成為掟貨藉口。不過呢類股票，上落無常，基金玩上玩落話晒事，美股忽上忽落又支配股價。假如博利豐超賣有技術性反彈，亦都冇利豐Call輪可以玩吓。9438明年10月到期，大把時間，不過槓桿率7.7倍唔算爆炸，而溢價則高到41.4%，博落去都冇乜意思，成交太少，買賣又困難。若然睇淡利豐，又係冇得玩，因為利豐冇Put輪掛牌。
德昌（179）與利豐係同一類股票，業務性質不同，但同美國經濟與股市齊齊掛鈎，呢件PE重勁（34.6倍），昨日微跌5仙。
德昌現價8.15元，睇嚟守唔穩，隨時好似利豐咁忽然一跌。3件Call輪中，9435屬高危輪，明年3月到期，現價72仙，溢價26.6%，槓桿率11.3倍。行使價9.6元，正股有排先有機會見呢個價。
章 盛