十八歲的Ryan唔想伸手問媽咪攞錢讀書，希望搵一份兼職半工讀，賺錢交學費兼幫補生活費。佢以前做過台式餐廳的水吧侍應，勝在肯學肯捱唔怕辛苦。如果你正需要一個兼職幫手，不妨考慮吓佢。
記者：李敬賢、陳漢榮
攝影：陳智良
學歷：中五畢業
工作經驗：水吧侍應1年、臨時演員1年、產品推廣員9個月
一技之長：肯學勤力
我的志願：
1﹒水吧侍應
2﹒臨時演員
3﹒雜誌模特兒
要求待遇：$5,500
聯絡我啦：95029185
自我介紹：一人應付十幾張枱
我𠵱家正在一間電腦學校讀廣告平面設計，唔想問屋企人攞錢讀書，所以想搵一份下午至夜晚的兼職。我中五畢業之後，做過台式餐廳的水吧侍應，識沖珍珠奶茶，又受得氣，一次過應付十幾張枱都掂。茶餐廳的水吧我都做得到，我份人肯學又勤力，好快就可以上手。
讀書時同學介紹過我做臨時演員，所以做臨記或者雜誌模特兒我都一樣應付得來。
1﹒沖飲品 3分鐘沖6杯
Ryan第一次學沖檸檬茶、奶茶同好立克。佢三分鐘沖好六杯飲品，奶茶同好立克都好味，但兩杯凍檸茶就沖錯咗，變咗凍檸啡同凍奶茶。拍攝場地的餐廳副經理Sunny提佢檸檬飲品要放攪羹，熱飲杯要有墊碟。
2﹒執枱又快又整齊
四位食客用餐後，Ryan唔使一分鐘，將成枱杯碟同碗執好，抹乾淨張枱，再排整齊好啲櫈。Sunny話，啲侍應好容易唔記得排整齊啲櫈，Ryan呢方面唔使提都識做。
3﹒整熱狗 一學就曉
Ryan未學過整熱狗，即學即做，放番茄生菜的步驟記到足。不過，教佢整熱狗的師傅無教佢麵包要先放入微波爐「叮」熱，結果「熱狗」變「凍狗」，但味道都唔錯。
4﹒擺甫士 扮Juno
Ryan想做雜誌模特兒，叫佢扮人氣偶像麥浚龍（Juno）擺甫士，佢揀扮攬咕𠱸的姿勢。大家覺得似唔似？
餐廳經理教路
Sunny話Ryan夠年輕又有經驗，想喺茶餐廳搵份兼職應該無問題，據他所知唔少茶餐廳都有請人。不過，Ryan見工時，最好將頭髮染番黑色，成功嘅機會較大。
推介二：高郁斐（有耳非文） 27歲
學歷：香港演藝學院、台南女子技術學院音樂科舞蹈組畢業
工作經驗：「有耳非文蟲仔竇」創辦人；與香港多名藝術導演合作舞台劇包括《我們互不相識的一小時》、《石水渠街72號的一片藍》；《西貢小姐》幕後服裝統籌；商台節目主持人等
一技之長：鋼琴、結他、雙簧管、小喇叭、作曲、填詞、京劇、啲噠舞、芭蕾舞、黃梅調，曾得叱咤903最佳組合銅獎
我的志願：歌手，找唱片公司出唱片
要求待遇：平均收入$8,000
聯絡我啦：94250942
自我介紹：有號召力有Fans
我叫有耳非文，出過《亂交叉來》和《打狗女郎》兩隻CD，現希望有一間唱片公司願意給我絕對自由，出我喜歡的、屬於我的、忠於我個人風格的唱片。我能玩多樣樂器，幕前演出經驗豐富，有一定的知名度，加上我曾經獲獎，有忠實Fans，號召力不弱，相信憑對音樂的誠意，能為公式化的樂壇添上色彩。
1﹒即興表演
拍攝期間，有耳非文一時興起彈結他、吹小喇叭，引來旁人圍觀，其吸引力可見一斑。
2﹒作曲填詞
有耳非文自稱全能音樂人，作曲、填詞統統難不倒她。
音樂人有嘢講
音樂人阿高：「現今樂壇偶像派當道，靚仔靚女始終有着數，建議不要太曲高和寡，做多些大眾易接受的音樂，在包裝方面下多些工夫，有理想不是不好，但要在香港樂壇生存，不得已也得作出有限度的妥協。」
推介三：陳嘉文（Louis） 20歲
學歷：中五
工作經驗：半年美容助理、年半接待員、2年酒吧侍應
一技之長：唱歌、跳舞、簡單英語、一般電腦操作
我的志願：
1﹒《便利》CoverGirl
2﹒報章雜誌ImageGirl
3﹒廣告模特兒
要求待遇：
CoverGirl：$10,000
ImageGirl：面議
聯絡我啦：61705406
自我介紹：泳衣短裙 性感有限度
我有美容證書，做過美容助理，對化妝有一定認識，平時都執到靚一靚見人，對自己樣貌好有自信，對鏡頭不會怕醜；擺Pose方面，我上過堂學Catwalk，行天橋冇有怕。現在最想做《便利》CoverGirl，泳衣、低胸、短裙這類有限度的性感我接受到，其他報章雜誌的Fashion版Model，我一樣有興趣，希望有人給我機會試試鏡吧。
1﹒腰肢柔軟 Pose高難度
做模特兒首要條件當然是樣靚身材正，其次就是身體柔軟度，能否擺高難度Pose，Louis即席示範拗腰Pose，輕而易舉。
2﹒自信又夠Cool
叫Louis擺個至煞食又能突出自己的Pose，她選擇棟篤企：「我覺得自己身材平均，個樣夠Cool，企得舒服自然，已經入型入格。」
失業唔使愁，《蘋果》可以幫你搵工，只要你肯出鏡兼接受訪問，一經刊登，你分分鐘會被未來僱主睇中！來信請寄香港將軍澳工業邨西駿盈街八號《蘋果日報》副刊「我要一份工」收。
傳真：27420542
電郵：