能夠成為香港亞運代表，理應感到光榮和驕傲。但是，若然記起四年前港隊在曼谷亞運，兩場賽事共吞十一隻光蛋的慘烈情況，作為一個職業球員，如有選擇餘地，今屆釜山亞運你會否再接受挑戰？這問題對於曾是過來人，及對香港足球未死心的丘建威來說，答案來得簡單──「有得踢亞運點解唔踢。」 文：李勇明
「阿丘」笑道：「如果政府可以多啲資助亞運隊備戰，唔使我哋倒貼打波就最好啦。」
今年五月，香港亞運隊教練黎新祥致電丘建威，問他有沒有興趣以「超齡球員」身份，帶領二十三歲以下足球代表隊出戰釜山。當時剛在漫長球季助南華奪得三料冠軍、身心已非常疲乏的丘建威想也不想，便答應了黎新祥邀請。
六月份世界盃期間，「阿丘」除了忙於為報章寫專欄及擔任電視台嘉賓主持外，每周也要抽時間投入亞運隊操練。他說：「試過有一日朝早要練習，中午返電視台，夜晚重要寫稿。朋友問我，『咁辛苦為乜？』我當時就攰到唔知點答佢好。」
炎炎七月，正當南華隊友紛紛出外旅遊度暑假，「阿丘」卻要隨亞運隊往歐洲斯洛伐克集訓兩周。
回想這次歐洲之旅，他最有印象是昂貴的長途電話費。「當地手提電話漫遊每分鐘十五蚊，喺嗰邊兩個禮拜嘅電話費差唔多兩千蚊，集訓前足總每人派一千蚊零用錢，連打電話都唔夠。」
事實上，入選亞運的代表每月獲足總二千五百元津貼，「阿丘」說：「相比七、八年前嘅待遇，今次津貼其實算少。嗰時踢一場波，贏咗有成萬蚊收入；但係今次亞運幾個月加埋先得萬零蚊。部份隊友月薪得幾千蚊，踢港隊嘅津貼對佢哋真係好重要。」
與一班年輕球員相處了幾個月，「阿丘」自言期間曾有在斯洛伐克捧「蛋」的不快經歷，也有在大球場賽和紐卡素青年軍的高興時刻；對於這班香港球壇接班人，「阿丘」有以下評價：「我覺得佢哋對足球好有熱誠，就算付出同收入唔成正比例，呢班後生仔練波依然咁努力。佢哋目前嘅缺點就係冇乜國際賽經驗，相信呢個亦係黎Sir搵我嘅原因。」
「同班後生仔一齊踢亞運，感覺同四年前唔同，至少，我覺得今次大家都係一條心去踢。自己踢得好輸畀人唔緊要，但絕對唔可以輸畀自己。我有咁嘅諗法，可能係我對香港足球重未死心啩。」丘建威說。