噚日《蘋果》登咗立法會議員劉慧卿要求研究聯繫滙率制度，結果搞到遠期美電俾人炒起，立法會財經事務委員會立刻急急撤回研究，但係呢類調查報告，立法會做得唔少，點解今次咁大鑊？
有商界老友同八方講，原來成件事係有人唔識香港議會運作，結果搞出個大頭佛！因為單新聞出咗，立刻俾通訊社廣泛引述，不過銀行界重傳得快，未到下晝呢個消息已經出咗鯉魚門，去到新加坡，重變咗話立法會下晝開特別會，取消聯滙咁話。之後呢個消息更「出口轉內銷」，傳到成個中環都知。
老友話佢哋聽到梗係笑到碌晒地，但一樣有人當真，或者借勢當真咁炒賣美電，但好明顯係老外唔知香港立法會係「橡皮圖章」，乜權都冇。佢重話若果立會有咁大權，第一件事都唔會去郁聯滙。
至於立會秘書長馮載祥噚日就驚足一日，怕做咗仙股事件中嘅鄺其志，無端惹禍上身。而劉慧卿就唔知驚唔驚好似馬仔咁，要鞠躬道歉呢？
傳真︰2623-9278
電郵︰