噚日謝霆鋒第二日上庭，晏晝佢同四哥（謝賢）及拉姑（狄波拉）去咗信德中心嘅金朝閣食晏，成班港聞同娛樂嘅記者合共二十幾人都跟埋去，不過就只可以喺樓下等。到咗兩點鐘左右，賭王四姨太（梁安琪）突然現身，佢一見到咁多記者，即刻一支箭咁衝咗上樓。
冇幾耐，記者又見到楊受成架車喺信德中心門口兜嚟兜去，之後佢同保鑣又喺現場出現，起初以為楊受成同霆鋒一齊食飯，不過霆鋒離開嗰陣，四哥竟然話：「唔係呀，佢（指楊受成）約咗第二啲人嚟呢度。」
莫非楊受成約咗四姨太？於是記者喺現場四圍打聽，終於知道原來楊受成係同成班猛人食飯，除咗四姨太之外，重有新世界集團主席鄭裕彤同埋華置老闆劉鑾雄，加埋其他朋友大概有十幾人。佢哋知道有大班記者殺到，食都食得唔安樂，好快就散水，最後成功由其他通道走咗，冇俾記者影到相。
不過奇怪嘅係，既然四哥知道楊老闆約咗人喺信德，點解重會去嗰度食晏，莫非有人唔想記者嘅注意力太過集中喺霆鋒身上，想聲東擊西轉移視線？
嫁咗畀外籍丈夫又離咗婚嘅女藝人，其實一早都知自己唔適合結婚，佢又唔係貪錢嗰隻，但係貪玩，幾乎以前同佢合作過嘅男演員都同佢有過一手，女藝人嘅風流性格喺圈中幾乎無人不知，所以啲男人只會同佢拍散拖，根本唔會考慮娶佢。女藝人如今同外籍丈夫離婚收場，已經心灰意冷，唔打算再結婚。
國際知名小提琴手Vanessa-mae，前晚喺灣仔會展舉行演奏會，大批知音人慕名捧場，其中湯寶如重同一名男士一齊出現，班記者一見到佢哋，自然想影相，點知湯寶如同呢位男士就愈叫愈走，同班記者上演一幕追逐戰，結果湯寶如終於肯停定落嚟，不過就死口唔認同行男士係男友。
日本偶像山下智久，今個星期二喺涉谷俾一個二十二歲嘅男人淋不明液體，起初大家以為同佢女友後藤真希有關，但係據日本報章《東京Sports》報道，有消息指嗰名男子嘅目標其實係山下智久嘅同門師兄瀧澤秀明，而警方重喺嗰個男子身上面發現奧姆真理教教祖麻原彰晃嘅照片，令到事件更加撲朔迷離。
看牛男歌手喺今年幾乎人間蒸發唔見咗，因為佢老細唔多睇佢，看牛男歌手喺失意之下，惟有寄情杯中物啦，不過佢嘅酒品就真係麻麻，有次看牛男歌手約埋一大班朋友走去中環一間酒吧飲酒，佢嗰晚飲大咗，竟然借醉攬住其中一個女仔唔放，搞到對方非常尷尬，係咁用手護胸推開佢。後來同行班朋友見佢咁狼死，都忍唔住拉開佢，個女仔先至可以甩難咋！
陳見飛早前為新歌《習慣》拍攝MV，搵咗一個男dancer做主角，重同佢有親熱鏡頭。不過拍攝當日，男dancer嘅女友監場，加上陳見飛怕醜到唔敢直望對方，搞到NG咗好多次。陳見飛話：「工作人員覺得我做得生硬，惟有幻想佢係我以前男朋友，咁先好啲。本來我想同佢女朋友講對唔住，但個女仔好nice，相信佢會明白，唔會嬲我。」
重記得早排有位女歌手去咗外地進修，結果被人傳佢其實去整容，最近馮仁昭個老友八畀馮仁昭知，嗰位女歌手其實係喺香港整容至真，至於女歌手搵嗰位醫生，原來係一個慈善團體女總理嘅老公嚟㗎，女歌手成日出席慈善活動，做做埋埋咁多善事，女總理老公幫番次手都好應該啫。
任賢齊（小齊）前晚喺尖沙嘴同歌迷一齊欣賞佢有份主演嘅新片《好心相愛》，問到小齊有冇遇過癡情女fans癡纏，小齊話：「有一次喺內地做宣傳，有女歌迷嚟我間房等我，助手見咁凍，好心畀佢入房沖個熱水涼，點知第二日惹咗八個歌迷嚟。」