大市重係未得住，中移動（941）跌40仙，滙豐（005）跌50仙，拖低大市。中移動去年911後最低18.15元，𠵱家18.45元，試低位唔奇，試完之後若然守得住，相關Call輪有得諗吓，主角係9532。呢件溢價成18%唔算平，不過明年3月至到期，溢價冇縮得咁快。
大隻藍籌中，滙豐現價84.75元距911低位68.25元好多，相對非常強勢。大市要見底，可能要滙豐都跌埋先至完成。睇滙豐向下，搵滙豐Put輪埋手，正路係9366，12月初夠鐘，現價75仙，溢價2.7%，槓桿率11.3倍。想搏殺多啲，揀9123，重有1個月左右到期，現價20仙，溢價4.6%，槓桿率42.4倍，食得鹹魚抵得渴，呢隻短期Put輪，睇錯市嘅話會輸得好杰。想穩陣啲，則揀9332，溢價同槓桿率細啲。
昨日講隻過山車恒指Put輪9205，提到行使價9693，實係10200之誤，喺度講聲對唔住。
9205下禮拜五屆滿，現價26仙，溢價0.08%（揸隻輪相等於畀恒指8點溢價），槓桿率12.1倍。未來幾日，恒指若跌300點，隻輪升約37%，恒指若升300點，則跌約4成，大上大落走勢唔變。
章 盛