九龍倉下半年嘅重頭戲深井碧堤半島，雖然話今日先至接受內購登記，但噚晚已經一邊搞嘉年華，一邊做內購，聽講做咗四個，其中一個係七座70樓C室，近千二方呎，每呎四千五元。噚晚嘅嘉年華「拉斯維加斯之夜」有成萬人到場，認真熱鬧。另外，九倉表示，即晚多收100票。
除代理開始大事宣傳外，發展商亦做足工夫，以求吸引多啲人參觀示範單位。今日起，凡到碧堤參觀示範單位，都可以參加即日抽獎遊戲，九倉每日下晝兩點、四點、六點同八點都會抽一次獎，中獎者可得到DVD一部，發展商準備咗一百部DVD機。參觀者還可參加每月大抽獎，獎品係雙人五天BellagioLasVegas酒店住宿連機票豪華之旅，價值超過兩萬蚊，發展商暫定兩套，但聽講會隨時加碼。每位參觀者獲贈一條Bellagio毛巾，而內購登記準買家都會獲贈一百蚊嘅酒店禮券。
昨日碧堤搞記招，長實又派十幾廿名置業精英（即賣樓員工），到深井踩人哋場，今次任記者影相。蘭西諗，一定係高層吩咐落，踩場都要顧住禮貌同有儀態，要大大方方，唔好失禮人。
小欖愛琴海岸公開發售成績麻麻，但係代理嘅促銷工作仍未停止。早前話送車同送旅遊嘅利嘉閣地產，噚晚抽獎，抽出兩個幸運兒，一個得車，一個得旅遊獎，今日頒獎。
頒獎地點喺灣仔靈獅車行，屆時利記何紹章、陳大偉同新地周國賢都會出席。由於今次只係頒架車畀得獎者，唔係好似早前鴻運咁搞即場揀車匙開車門定得主，所以應該唔會有得主開心到喊嘅場面。今次利記送嘅係價值10萬蚊標緻206；旅遊獎係價值2.5萬嘅雙人希臘旅遊。
想見中秋節嘅主角嫦娥，唔使去月亮搵。元朗蝶翠峰就有一個。原來中原地產搞咗個攝影比賽，安排模特兒喺售樓處扮嫦娥畀攝影發燒友拍照，呢個「蝶影照嫦娥」攝影比賽，冠軍有三千蚊現金獎，亞軍同季軍分別有兩千同一千蚊。
參賽者只需將5R參賽作品，連同個人資料，喺本月24日前，寄去中原嘅中環總行，26日會公布得獎者。
新盤焦點雖然喺新界青山公路沿線，但其他樓盤冇放鬆過。新世界同泛海合作嘅太子道別樹華軒，聽講就快賣，現樓示範單位準備就緒。利嘉閣地產林家樂話，個盤最平單位唔使100萬，應該吸引到唔少上車客同上班一族。睇嚟代理已經開始做定吸客工作。
別樹華軒喺地鐵太子站側，係單幢服務式住宅，有百七個單位。
地產商主力係買地同賣樓，起樓多數搵承建商負責，就算旗下有建築公司，都係做番自己集團嘅嘢，好少做街外工程。
樓市大好友信和，聯席董事兼公司秘書葉世光噚日同蘭西講起，準備競投金鐘添馬艦政府總部設計同建造工程合約。政府早前接受投標者資格預審申請，11月15日截止。發展商若果做埋承建商，啲建築公司就好大件事嘞。
新地推出馬灣珀麗灣之後，有幾個新盤跟住開售，諗住食住個勢，點知唔係咁賣得，成個市即刻「謝」晒，但係當日令珀麗灣賣個「滿堂紅」嘅新地代理執行董事雷霆，唔再搞屋苑式樓盤，做番拿手好戲豪宅，就係西半山寶珊道一號。由於雷生幾次賣樓啲代理搵到食，所以好多代理盯緊呢個盤。
雷霆近期開始為寶珊道一號吹風，意向呎價九千至一萬蚊，而頂層複式話要成萬五到萬六蚊，又話只係會推出一半約三十個單位賣，總之就係大把人要啦。啲代理話做到呢個盤，佣金可以夠捱一個月咁話。
蘭西翻查新地年報，原來該盤總樓面有十二萬方呎，若果做到九千蚊一呎，總值近十一億，個半佣就係千六萬，各代理行分到嘅數未必夠一個月皮費。
蘭西
電郵地址：