黎明噚日去銅鑼灣時代廣場，以籌款大使身份出席麥當勞世界兒童日嘅「童心記者會」。
講起近排電影票房差，有人提意藝人減片酬救市，不過黎明就唔多贊成，重大彈香港人冇創意，佢話：「我覺得呢樣嘢好無聊，香港人冇創意，有就應該拍多啲唔同類型嘅電影，等觀眾有共鳴。至於冇乜人肯畀錢出嚟投資，個市係要自救，大家要合力先得。」
而身為籌款大使嘅黎明，喺現場亦同一班可愛嘅小朋友做呼籲，有份參與嘅小朋友當中，雖然有五位係患病小童，但係佢哋都好落力呼籲市民買明信片籌款。另外，黎明重話聽日雖然係中秋節，但要喺工作中度過，因為佢要為新歌《你要懂得欺騙自己》拍MV。
洪天明噚日喺電視城現身，馮仁昭問佢同鄧一君嘅關係點，佢話：「不嬲都冇偈傾㗎啦，做人嘅嘢你識得尊重人，人哋就會尊重你，唔該唔好咁小家，要講就講埋個名出嚟。」古天樂新書中提及出賣自己嘅嫌疑犯，好似係洪天明喎？洪天明話：「應該係三年前發生，有朋友話我知，話我將古仔啲料放畀記者。如果係真，我有乜着數？曾經有一段時間，我同古仔日日都一齊，佢嘅嘢我乜都知，但我只係講佢嘅好話，對呢個朋友我問心無愧。」
另外，有雜誌影到洪天明同車婉婉一齊，洪天明話：「我知有人跟我，但嗰日我重有同梅小惠佢哋成班人一齊！」
名媛因為同老公感情出現問題，成日都好唔開心，於是經常同朋友去蒲，令自己忘記不快事。其實名媛份人好簡單，好易俾人出賣，佢有個同性戀外籍朋友竟然自爆話同佢有私情，搞到名媛為此事喊咗幾次。其實名媛點蒲都好，佢私底下係個好媽媽，即使佢屋企好有錢，佢都唔請補習老師，堅持親自教仔女做功課，等仔女溫習完先會出街玩。
何潤東、邱澤、胡雅評同陳怡蓉噚日抵港，為亞視下星期一播出嘅劇集《雪地裏的星星》宣傳。噚日都有幾位歌迷嚟接機，而四人當中以邱澤最受歡迎，fans不斷同佢合照及索取簽名，反而來港最多嘅何潤東，就相形失色。
問邱澤會唔會乘機喺香港玩玩，佢用國語話：「不會吧！我好想去睡覺呢！」
早排搭上咗內地富豪嘅女星，近期可謂危危乎，事關識得耐咗，富豪對佢已經失去咗當初嘅熱情，加上始終覺得老婆重要，所以開始疏遠女星，但女星就日日嚟個追魂call，富豪去到邊都追到實，搞到富豪好煩。女星以前成日叫阿媽煲湯請富豪返屋企飲，𠵱家呢招已經冇效，睇嚟佢哋好快就會玩完。
無綫有位小生，外形成個「佬」咁款，佢拍嘅劇唔係收視特別高，佢嘅觀眾緣亦唔係特別好，但偏偏無綫成日搵佢擔正，唔係做人師傅，就係飾演皇帝，而且有成二萬幾蚊一個騷，令到唔少人條氣好唔順。唉，鬼叫人哋有個老婆係無綫皇太后老友，成日陪皇太后打牌咩。