馬主H個肥仔係打機一代，自細打機，由超級任天堂打到PlayStation2，樂此不疲，放暑假可以由朝打到晚，晚上打到凌晨，馬主H勸極都唔聽，為之冇符。肥仔嘅中學同學入讀港大、科大、理大、城大，無論讀邊科，都同樣鍾意打機，互爭短長，久唔久就到馬主H屋企展開大戰，馬主H嘆曰：「打機大學生如何救港治港？」肥仔嗤之以鼻：「你生活在三十年前，今日青年不打機，無以言，吟詩作對冇人識㗎。」
好彩打機打得多，有意外收穫，就係肥仔為咗打機，愛上了日文（啲甚麼打機全攻略，皆係日文原著，電子遊戲亦係日語產品），讀咗三年之後，講日文好似講廣東話咁流利，識咗日文之後，更買多啲日文game書嚟睇，𠵱家識得彈啲中文打機全攻略繙譯得差，唔可靠㖭。
最近肥仔到東京，如魚得水，周圍講日文覺得好方便。日本人就係咁，你同佢講英文，耍手擰頭，情願唔做你生意；同佢講日文，即刻面口都唔同，特別好招呼，馬主H本來係多口之人，呢次到東京只係負責找數，一切由肥仔講晒，等佢威風。東京嘅澀谷區、新宿區有好多打機店，肥仔晚晚都入去打番幾鋪，居然一百日圓就打足一小時，在機舖內稱王稱霸，馬主H為之冇眼睇，苦思打機一代香港男仔，他日如何成為治港（政府與商界、教育界）接班人！