新一屆法國巴黎車展開幕日期漸近，就有更多車廠公布將於場內展出車輛嘅資料，就連德國奧迪車廠亦唔例外，日前亦公布咗關於新款S4四門及旅行車嘅資料，以求讓一眾車迷能先睹為快。
新版S4將會起用一台4.2公升V8偈作核心，馬力344ps/7000rpm，扭力則為41.8kgm/3500rpm，匹配一套6前速手動波箱，從而令其可有出色嘅性能表現，難怪0至100公里加速度僅為5.6秒（四門型號），而極速更可高達250km/h（四門型號）咁快啦。外形就更加煞食，除保持原有跑車造型外，與車身同色嘅頭泵把連大型生風導入口、炯炯有神嘅Xenon頭燈、闊大尾喉、電鍍門邊鏡殼，同埋S4四門型號獨有嘅尾翼組合等等，一派跑車形象表露無遺。車廂布局亦經過重新鋪排，一雙Recaro跑車桶椅備有電控功能，乘坐舒適度高之餘，三幅式真皮跑車軚環亦見吸引度十足㖭，有興趣嘅朋友就要留意推出日期喇。