意大利聯賽冠軍祖雲達斯喺前日嘅歐冠盃E組分組賽俾主隊嘅飛燕諾迫和一比一之後，全隊上下都牙痛咁聲，因為佢哋覺得球證盧比斯冇理由畀對方前鋒雲荷當一個自由球射三次，結果就真係出咗事，個波最後射入咗。
不過，我求大俠就唔係咁同意祖雲達斯職球員嘅觀點嘞，邊個叫你哋排人牆嘅時候，不斷咁推對方嘅反人牆，搞到頭兩次冇離球十碼呢？
坦白講，如果祖雲達斯嘅球員乖乖地第一次就企好排人牆，雲荷當未必射得入，但𠵱家你畀咁多次機會人哋，好似練波咁不停係咁射，雲荷當射唔入咪好冇面？
唔知係咪教緊嗰隊樸茨茅夫今季好似支箭咁響英甲聯彈出，令到哈利列納自己做乜都想快啲，好似想快啲簽到熱刺中場舒活啦，連揸車都要超速至夠爽。結果最近呢位五十五歲嘅前韋斯咸領隊，就被英國警方捉到揸快車，被判罰停牌半年，呢次真係快字得個慢囉！
羅馬嘅球員又炒車喇！呢次嘅「事主」係簡迪拿、薛比拿，重有一個冇公開姓名嘅球員，意外係喺佢哋參加完門將安東尼奧利嘅生日派對，響回程途中發生嘅。之前羅馬已經有托迪、蒙迪拿、卡斯辛奴等人炒車嘅前科，加上今季佢哋已經接連響聯賽同埋歐冠盃輸波，唔知呢啲黑氣幾時至散呢？
曼城後衞R鄧尼因為經常醉酒鬧事，上周被會方棄用，好在球會最後決定再畀機會呢位新星，淨係罰佢兩周人工。不過李斯特城嘅老將韋斯就冇咁好彩嘞，同樣係因為紀律問題而惹禍，周三被聯賽仲裁小組決定李斯特城有權即時終止韋斯合約，令佢唔見成三百萬鎊人工兼要加入失業大軍，可謂同人唔同命！
印有朗拿度個名嘅波衫喺西班牙銷量唔錯，佢本人都唔執輸，好似以前喺國際米蘭咁同球會攞衫送畀親朋戚友。點知皇馬方面話有例規定球員唔可以攞，要畀錢買，重最多打個八折，結果「哨牙仔」最後只買了二十件。球員要畀錢買自己波衫，我求大俠都係第一次聽！