一直被視為中價轎車有大車風範嘅日產Cefiro車系，為要貼近時代步伐與時並進，最近推出Cefiro2.0SilverReflex特別版，車價較前調低有吸引力之餘，佢重多加有High-tech部件裝飾，增添一份時尚吸引嘅魅力㗎！
記者、攝影：陳偉林
新車售價：$199,800
車輛提供：合誠汽車（23688235）
日產用以抗衡本田Accord及豐田Camry嘅Cefiro車系，一直有唔錯嘅口碑及捧場客，惟香港車市吹淡風，代理為要吸引買家，最近亦推出SilverReflex嘅2.0公升特別版；響全新富動感嘅鬼面罩襯托下，加上電鍍門邊鏡、尾燈組合同門枕鋪排，既High-tech又見有一份時尚魅力，加埋有號召力嘅新車價，又真係幾有瞄頭噃！
向以車廂闊落見稱嘅Cefiro，前後兩排原廠高級皮椅貼身富承托感外，四周重有桃木裝飾，加埋電鍍門枕配搭，自然烘托有多一份凝聚魅力。另外，除電窗、電鏡及中央門鎖外，少不了重有原廠電天窗、恒溫冷氣及高級音響配備，難得車頂有前後獨立房燈同扶手外，就連前排椅背亦備有扶手㖭！
然而，日產Cefiro有好口碑，其中焦點所在會係一台來自VQ系列嘅2.0公升V6偈，輸出順暢富柔韌性外，難得係運轉夠寧靜，完全符合轎車應有身份嘛！再者，穩紮底盤及懸掛組合，置身其中重體驗出軟硬適中嘅支持力同高循迹感㗎！