楊恭如對於緋聞男友周正毅在報章公開抨擊自己，她稱對方是一個有風度的人，從不相信周正毅會如此批評自己。她說：「乜嘢關係都好，唔需要第三者畀意見。」似乎完全當周正毅太太毛玉萍透明。
楊恭如和周海媚昨日在尖沙嘴海港城出席STARJEWELRY開幕禮，二人均獲送六位數字的鑽飾。周海媚打扮隆重，以低胸裝上陣，不過卻被新聞人物楊恭如搶去風頭。對於「上海首富」周正毅日前表示不想楊恭如破壞自己家庭，楊恭如表示絕對不相信周正毅會這樣說。
楊恭如說：「我冇諗過佢（周正毅）會咁講，我亦唔信佢會咁講。喺我心目中，佢係一個口才好好嘅人，為人亦好有風度，一個有少少風度嘅男人都唔會咁講，根本就唔合情理。我唔會搵佢了解件事，時間會證明一切，佢係生意人，唔係明星，咁會令佢好困擾。」
楊恭如續說：「我唔知同有錢人做朋友會有咁多事發生，我識佢嘅時候，佢只係普通人，唔係有錢人，唔係首富。近年咁多揣測，邊個鍾意邊個，呢啲嘢好無謂，我對男友嘅要求只係要對方心地好，有冇身份地位、有冇錢、靚唔靚仔都唔重要，如果有真命天子，對方係有身份地位嘅話，我唔會公開，因為好煩。」
問楊恭如近日新聞會否影響她和周正毅的友情，恭如說：「人哋講太多啦，我同佢乜嘢關係都好，係我哋之間嘅事，唔需要第三者畀意見。我唔識佢太太（毛玉萍），亦唔怕佢誤會，咁簡單嘅嘢都會誤會，咁好多嘢都會有誤會，我冇做虧心事。
「今次係我最後一次回應呢件事，我唔想畀啲有心做新聞嘅人攞嚟講，唔想畀機會人哋破壞我嘅聲譽，我亦費事講多錯多。」
而記者就此事聯絡身在內地的周正毅，他只說：「我真係唔想再講呢件事。」
採訪：林妙萍攝影：陳偉權