歐亞農業（932）噚日被證監會勒令停牌，即刻搞到全線民企股跌到四腳朝天。究竟歐亞為何被叫停，到小初寫稿一刻都未搞得清，但市場則鬼咁大反應，明顯係人心虛怯，有咩依郁就即刻鬆人，要錢唔要貨。
若家陣重有民企股價企硬，恐怕最主要原因都係冇街貨。例如上次小初提過，股價長期企硬嘅中國特種纖維（285），在民企經歷多番打擊後，竟然仍企穩1.40元，同全年最高位1.52元只係相差少少，就可以知道街貨有幾乾。
經紀陳話，中國特種纖維將於下周四公布中期業績，如無意外，業績會好靚，聽講唔排除會順便集資抽水。但在今時今日咁差嘅氣氛下,抽唔抽得成重係未知之數，只有祝佢哋好運。
好似近排曝光頻頻嘅恒豐金業（870），近兩日股價跌穿10仙，噚日收8.2仙。小初之前都講過，市場傳聞恒豐搞批股。經紀陳話，恒豐股價表現咁差，恐怕都係泡湯居多。
慕容小初