阿虎初時以為歐亞農業（932）只係俾大戶清倉咁簡單，點知噚日失驚無神被證監停牌，迫公司公布股價敏感消息，俾證監會命令停牌嘅公司，通常都唔慌有好嘢，復牌後例牌會大插。市場傳出公司將出現人事變動，主席楊斌可能地位不保。
前日撈底嘅炒家，今次真係有得震無得瞓，好彩阿虎剛失業嘅紅顏知己一早清貨，否則真係連養老金都輸埋。
歐亞停牌，芬佬惟有沽其他民企補數，大成生化（809）全日挫14.3%，收報1.50元，成交2335萬元；超大現代（682）亦挫10%，收報2.05元，成交有成3221萬元。阿虎聽到，噚日唔少經紀行猛叫客人沽清民企，若係孖展倉則叫客人補倉，補唔切就要斬倉。
不過一直受到基金增持嘅民企比亞迪（1211）則持續企硬，升1%，收報16.75元，成交2626萬元。比亞迪完全不受民企拋售潮影響，幕後人士都算實力驚人及夠齊心。不過，阿虎就驚佢哋可能受到民企拋售潮影響，而且呢一類嚴重歸邊嘅股份，一旦基金散貨，通常會跌得相當急。當然，無人會知基金幾時出貨。
有線寬頻（1097）動用15億元向九倉贖回可換股債券，令股價持續受壓，股價昨再跌7.5%，收報3.075元。市場原本估計有線可能會用現金派特別股息益股東，點知公司喺負債水平唔高嘅情況下，用大量資金來還債，此舉亦反映業務增長有限。一間公司既無派送，又無強大增長潛力，重邊可以吸引到投資者，唔怪得消息一出，即刻有人沽貨，令股價受壓。
阿 虎