八方最近睇報紙，見到一單「現代羅密歐與茱麗葉」嘅古仔，一個由海外返港度假嘅十九歲學生哥，為咗在赴美深造前送份禮物畀女朋友，竟漏夜偷偷爬窗出街，結果失足跌落平台，好彩冇乜大礙。
八方正好奇點解呢個時代，重有人浪漫得咁緊要，又可以話儍得咁緊要，噚日有人報料話，男主角原來係全國政協常委徐四民個乖孫。睇嚟佢哋兩公孫都一樣咁愛情至上！
八方噚日打電話向徐老求證，佢承認當日爬窗跌落街嘅男仔係佢個孫。查實更加準確啲，應該係外孫，因為男主角應該係徐老嘅細女、同名醫吳歷山所生嘅細仔吳耿南。徐老話，外孫同父母同住，佢都唔理得咁多嘞，重反問八方關佢乜事㖭？「外公公管不了，他在談戀愛。」
不過，徐老雖然話唔管，其實都好緊張嘅。八方睇番徐老本自傳，徐老一共有內外孫五名，編者吳祥珉重係代後記寫過，𠵱家喺徐老眼中最重要就係孫。
徐老話所有孫嘅功課佢都有監督，重要教佢哋認祖歸宗㖭。佢重話：「孫子可以管，曾孫就管不了啦。」
呢位現代羅密歐咁勇，睇怕都係繼承咗外公重情嘅優良傳統。
徐老由四○年喺仰光同太太結婚之後，非常專一，即使返北京開會，兩夫妻多數一齊出現，恩愛得令人羨慕。不過，徐老外孫拍拖時拍拖，都應該聽老竇話，同埋唔好再做啲危險動作嘅。
（圖）徐四民的外孫吳耿南日前為會女友，爬窗墮傷，幸無大礙。 資料圖片
傳真︰2623-9278
電郵︰