響昨晚舉行嘅公務員慶祝國慶酒會上，出席者包括六七個司、局長，加埋特首同中聯辦、駐港外交部頭頭高祀仁、吉佩定，要出位一點都唔易，主禮台上要企二十個嘉賓，連保安局局長葉劉淑儀都要靠邊站。
不過，葉劉始終係葉劉，頸上一串特大珠鏈，配上手上同款珍珠戒指，咁就出到位嘞。啲珠鏈唔係講笑，粒粒都大過葉劉對眼。不過，形狀有啲三尖八角。
八方問葉劉，條鏈係咪南洋珍珠，佢叫八方自己估吓，又笑八方太八卦。不過，佢都好樂意講解下條鏈。據佢講，啲珍珠係天生形狀不規則，呢款叫做Baroque（巴洛克)。八方知呢個原本係葡萄牙文，指畸形珍珠，現代叫異形珠。一般又圓又大嘅珠當然會貴啲，三尖八角嘅珍珠屬次等，價錢都平啲，但葉劉就話自己兩樣都咁鍾意。
（圖）葉劉藉國慶酒會晒行頭，戴異形珍珠鏈同珍珠戒指搶鏡成功。 黃建通攝
傳真︰2623-9278
電郵︰