福特Focus落場版參加亞洲區賽事，經已有三年多歷史，而成績重一年比一年好；今年更於多項賽事中力壓其他對手，並讓其拍檔車手李萬祺，於香港房車錦標賽獲得三冠一亞嘅成績，以及奪得參加澳門格蘭披治大賽嘅資格。究竟李萬祺對其Focus戰車有何評價，而呢部車又有何特別呢？今日不如一齊嚟睇吓。
記者、攝影：黃凱穎
PaulRidgway又指出，由於Focus本身引擎室空間大，而引擎設計簡單兼容易維修，可稱得上係一部極具潛質嘅戰車；未來將會集中響改善制動表現方面，因為珠海賽車場直路少但急彎多，並無足夠時間去冷卻制動系統，雖然如此，但珠海賽車場正好係一個極好嘅測試場地。至於澳門格蘭披治大賽嘅賽道，相反係直路多急彎少，所以制動方面絕對足夠應付，但引擎馬力輸出方面則須作出適當調校，才可爭取到更好成績。
據GRMotorsport車隊經理PaulRidgway表示，Focus呢幾年內喺各項賽事中嘅成績愈來愈有進步，加上今年用上Dunlop專為SuperProduction賽事而設嘅輪胎，會更適合作賽之用；另外喺今年10月中，重會改配一台由英國改裝嘅ST170引擎，馬力輸出約比現有一台2.0公升ZetecE引擎多出約25匹，加上輸出較為平均，故起步加速都可有出色表現。
已簽約國際汽車推廣運動有限公司為經理人、GRMotorsport車隊主力車手，並已奪得香港房車錦標賽三冠一亞成績嘅李萬祺表示，Focus彎路速度非常高，而且引擎輸出範圍甚廣，就算直路被對手追過，都可以喺彎路上取勝，但制動方面則略嫌稍遜，並需改善一下。對於快將換上嘅ST170引擎佢亦抱有好大期望，因為Focus本身已有出眾嘅彎路表現，若能將馬力輸出增加，一定可以取得更好成績。