積金局行政總監許仕仁話走唔走已經講咗好多次，佢老哥終於向主席李業廣遞上辭職信，鐵定明年二月，滿五十五歲便不幹了，叫董事局執生，快啲去搵人。聽講老許已經訂埋音樂會嘅飛，準備同老婆一齊享受退休生活。
講開老許，八方覺得佢最醒同至識走位，如果唔係陳太當年眷戀政務司司長嘅職位，按原定計劃六十歲退休，咁老許就好難推得甩唔做財爺。點知陳太又做唔埋尾，總之打亂晒原來部署，財金系統嘅帥印落在阿松手上，老許就閃咗入積金局，不理世事，離開官場是非之地。𠵱家新人馬仔嘅表現，大家有目共睹，然後先知道，老許請議員食黃油蟹呢條橋，唔係人人都啱用。馬仔肯定有排學。
另外八方重聽到一條消息，就係阿松今年初的確親自挽留過老許，但唔成功。重有一條堅料，就係阿松曾經叫過老許同其他公營機構看齊減人工。點知老許話，可以成份人工畀晒佢，因為唔想撈啦。
𠵱家嘅肥佬許已無所求，一心只想同夏叔拍檔，做好三年馬會董事，你又奈得佢乜何？至於老許嘅接任人，兩位陳太，包括陳唐芷菁同陳甘美華都有上榜，睇吓獵頭族獵到邊個。當然，唐小姐嘅丈夫係金管局高官，肯定睇高一線。
傳真︰2623-9278
電郵︰