元朗錦綉花園，上半月只有四宗買賣，中原黃春華話，係十三年來成交最少嘅紀錄，估計全月都唔多過八宗。
錦綉花園成交疏落，因為業主認為洋房值錢，所以唔肯減價，就算減，幅度都唔夠大，咁點吸引到買家呢？最近有個荔枝北路單號屋銀主盤，千一方呎，連千二方呎花園，放盤四日就賣咗，成交價二百九十萬元，每呎二千六蚊，比市價平一成半。
黃春華指出，錦綉花園喺九七年高峯期，每個月有近七十宗買賣，金融風暴之後，都有二三十宗，即使近月交投量係咁跌，上個月都有十二宗，今個月重差。不過，租務就平穩，一個月有二十宗。
錦綉花園有五千幾間屋，𠵱家有四百幾個放盤，屋苑內有十間代理行，代理人數超過三十人，上半月只得四宗成交，即係有好多人冇單開，真係搵食艱難。
蘭西周二睇過跑馬地禮頓山嘅交樓單位，除咗驚覺新地起樓效率高之外，重發覺佢哋好識得包裝個盤。
睇樓期間，蘭西見到每個單位都有一個好精緻嘅箱，詢問之下，原來個箱裝咗好多鎖匙，每個單位兩套，數埋有幾十條咁多，個單位有幾多間房，可想而知。
另外，禮頓山四千幾呎嘅相連單位，客廳牆身有六個調控掣，究竟有乜用？
原來每個掣控制一部冷氣機，即係話，淨係客廳就有六部冷氣機。睇嚟電費都會好重皮。
不過，買得起幾千萬豪宅，都唔會計較呢啲小數目。
發展商為咗增加樓盤嘅知名度，以求促銷，所有宣傳渠道都會用上。
蘭西多次提到發展商開始喺地鐵嘅電子屏幕賣樓盤廣告，但都係本地樓盤，好似將軍澳嘅將軍澳中心同維景灣畔、荃灣名逸居等。最近連內地樓盤都有賣廣告，就係和黃嘅珠海海怡灣畔。
睇嚟內地樓盤只係喺九鐵車廂賣廣告嘅時代已經終結，唔知對九鐵嘅廣告收入有冇影響呢？
發展商賣樓近來興搵代理幫手，等個盤氣勢好啲，銷情靚啲。委託嘅代理通常都有五六家，佢地話，發展商不時都暗示各代理行要為個盤做啲嘢，咁代理自然識做，搞吓記招搞吓活動，向發展商爭表現。所以一個大盤，代理開嘅記招多過發展商，有時因唔想畀對手知道自己點搞法，就出現即日call記招嘅情況，為咗吸引傳媒到場採訪，又要勞動發展商到場，搞到發展商一日要走幾場。傳媒上晝見完下晝又見，邊有咁多嘢可以問呢！結果係點？唔使講都明啦！
屋之島早前話細屋搬大屋，原來新總部已經喺噚日開業，新址係怡和大廈22樓2201室，聽業界講，個單位有九千一百多呎，估計呎租起碼超過二十六蚊，計埋其他雜費，月租超過三十萬，一年差唔多四百萬。
究竟屋仔點解咁大手筆搬大屋，業內人士猜測，可能係佢哋同置地關係唔錯，只要做到幾單置地寫字樓嘅大手租務就乜都賺番，至於中環國際金融中心二期，可能都係佢哋嘅目標。
另外，市傳置地嘅外籍高層要親自出馬，去同啲客做presentation，假如係真嘅話，咁個寫字樓市道就認真冇眼睇。
蘭西
電郵地址：