港股前日彈升202點，昨日又再衰過，跌夠233點，呢鋪又係美國佬累事。
大市同啲藍籌咁跌法，自然係Put輪世界。成交金額最勁嘅係恒指Put輪9205，雖然冇上日咁多，但亦有242球，銀碼6千萬。前日16.9仙，昨收24.7仙，升幅46%，龍虎榜上排第2。隻輪今個月27日到期，已到末日。睇吓下便張走勢圖，就知道嗰種過山車式上落，由仙股風暴前到上月下旬，1個月內，大散8成，然後又喺唔夠1個月內，大漲3倍。
未來幾日，恒指如攀升219點（至9693行使價）以上，揸隻輪就會「壯烈犧牲」。如果跌多二三百點，則隻輪可再升3成。大市瞬息萬變，上落幾百點等閒事，落注嘅話，必須知道食得鹹魚抵得渴，贏輸都係大大舊。
升幅最大嘅係滙豐Put輪9123，有47%。滙豐（005）跌2.3%，隻輪發揮好勁嘅槓桿效應。9123下月杪夠鐘，現價18.8仙，溢價5%，槓桿率45.3倍。行使價82.9元，正股做緊85.25元，個幾月內如果唔低過82.9元（即使再跌2.35元以上），則隻輪會變廢紙。去年11月至今，正股未試過低過84元，呢1點要留意。
章 盛