早個星期，剛巧係美國9-11事件周年紀念，唔少香港人連亞Mark在內，都將視線放響呢件事上面；但想唔到幾乎同一時間，本港車壇竟有一單漏網新聞噃！若然大家有行經港島淺水灣嘅影灣園，唔知有無留意到響佢哋庭園前面，出現咗一座以木板搭建而成嘅小白屋呢？響小屋嘅四周既沒有門窗，同時重響唯一嘅通道兩旁，擺放有近六呎高嘅植物，而不時重有身形魁梧嘅便衣保安員巡邏㖭！然而，每隔一段時間就會有不少豪華轎車，由有關職員帶領下直入小白屋嘅門前，相信有幸獲邀入內嘅嘉賓，全屬一班商賈有名望嘅人士㗎！
據線人向亞Mark透露，小屋內裏係擺放有將於明年初才正式面世嘅勞斯萊斯轎車。事緣要等2002年告終，勞斯萊斯嘅品牌才納入德國寶馬旗下，而香港代理權亦會同一時間轉到森那美集團手中；但為要爭取到買家嘅支持，因而廠方不惜預早將新車曝光，再經由新代理巧妙安排下，給一眾VIP客先睹為快，咁咪唔會牴觸原有合約囉！
據知，呢部全新勞斯萊斯轎車，裝有跟寶馬快將推出嘅760Li轎車相同的一台6.8公升V12引擎（馬力約450匹），車長約5400mm，要較現時寶馬嘅745Li多出約231mm咁多，而且兩邊車門重採用左右開揭式設計，定價約港幣400萬，相信會吸引到唔少香港買家認購㗎！