近期，本港車壇湧現咗多款歐洲小車，佢哋除外形及車廂設備夠吸引外，相宜售價亦為賣點之一；但究竟當發生意外時，邊款車最能保障你嘅安全呢？最近由EuroNCAP所做嘅一份撞擊測試報告，就將其中三款在港有售嘅歐洲小車納入測試範圍，大家可從中得知結果。
記者：鄭達基
註：假人公仔上的顏色，代表汽車對乘客之保護程度。
福士Polo在是次測試中所獲得嘅評分甚高，當車子模擬以時速64km/h正面撞向障礙物時，設於前座嘅安全氣袋能及時彈出，可大大減低前排乘客及駕駛者，於意外後胸部撞向軚盤或表板而受傷嘅機會；同時，經改良後嘅車廂鋪排，亦減低咗前排乘客腿部及腳部受傷機會。不過，由於用作測試嘅車輛，後排中間座椅只配用兩點式安全帶，對乘客之保護程度較三點式安全帶為低，略嫌有點美中不足。至於模擬被時速50km/h汽車攔腰撞及時，設於車上嘅側氣袋亦能充份保障到乘客安全。
正面保護率 75%
側面保護率 89%
整體保護率 82%
自推出以來一直廣受車迷追捧嘅Mini（用作測試之車款為MiniCooper），當模擬以時速64km/h正面撞向障礙物時，設於前排嘅安全氣袋能於極短時間內彈出，可有效保障乘客安全；不過，駕駛者嘅胸部雖可避免撞向軚盤而受傷，但頭部卻有可能滑出安全氣袋，而撞向車窗或車內其他部份，因而受到不必要嘅傷害，幸而車廂於撞擊後亦無出現嚴重變形，從而為保障乘客安全增添不少分數。另外由於新Mini嘅車架較前有所強化，再加埋有側氣袋配搭，故當模擬被其他汽車以時速50km/h攔腰撞及時，可有效保障乘客安全。
正面保護率 63%
側面保護率 78%
整體保護率 74%
而近期重新打入香港市場嘅歐寶Corsa，亦被列入是次測試嘅車款之一。在模擬以64km/h正面撞向障礙物嘅測試中，除設於前排嘅安全氣袋能於瞬間彈出，保障到乘客安全外，車架於撞擊後亦無出現嚴重變形，從而可大大減低車上乘客受傷嘅機會；另外，廠方亦於車內增設更多保護設施，以保障乘客安全，但仍略嫌未能保護駕駛者腿部嘅上半部份，而後排中座與福士Polo一樣，只配有兩點式安全帶，若能改用三點式安全帶會來得更好。而當模擬被時速50km/h汽車攔腰撞及時，側氣袋能有效保護乘客頭部及胸部，從而大大減低不必要傷害嘅機會。
正面保護率 69%
側面保護率 78%
整體保護率 74%