「我唔會做主動」
楊恭如承認與周正毅有聯絡

楊恭如和「上海首富」周正毅傳緋聞，有消息指是楊恭如作主動。楊恭如昨日承認和周正毅有聯絡，但她自稱冇錢人，並說冇錢人和有錢人一齊，不一定是冇錢人作主動。周正毅接受電話訪問時，則表示不想破壞自己的家庭，他還說：「我唔想再講呢個人，亦唔明點解佢會咁講。」

昨日位於銅鑼灣的「大桶水足部按摩專門店」開幕，股東楊恭如、文雋、陳曉東和吳志雄等均有出席，楊恭如透露自己投資了約六位數字。
楊恭如和「上海首富」周正毅傳緋聞，楊恭如更曾表示周正毅是她堂表哥的同學，幼稚園時已認識，迄今相識二十多年。最近有消息指楊恭如經常到周正毅在上海的蒲點找對方，兩人的交往是女方作主動。就此事問楊恭如，她顯得十分愕然。

「好鍾意都唔會」
楊恭如說：「唔係啩！我唔知邊個傳出嚟，我諗係有人有誤解，有錢人同冇錢人一齊，人哋一定會以為冇錢人做主動，但事實唔一定係咁。可能啲人好奇，想像力豐富啦，通常都會話明星唔啱，但唔可以一竹篙打一船人。我唔會做主動，就算好鍾意都唔會，如果對方有feel就唔需要做，如果對方冇好感就算做主動都冇用。」

「唔想影響家庭」
楊恭如承認和周正毅有聯絡，至於上次聯絡是何時，她說：「唔使講到咁詳細！」問她可有去周正毅的蒲點找對方？她說：「上海來來去去都係嗰啲蒲點，就算我有去都唔代表啲乜嘢。我唔會避忌，我唔會鬼鬼祟祟，會大大方方。」問她可會徹查是誰放料？楊恭如哈哈大笑說：「我唔會徹查，有報應嘅。」
記者昨日就此事聯絡身在內地的周正毅，他說：「我唔想再講呢個人（楊恭如），我唔知佢講乜，我亦唔明點解佢會咁講，我唔想破壞我嘅家庭。」記者追問他和楊恭如是否仍然是朋友，周正毅說：「我真係唔想再講，我開緊會，好忙。」
採訪：陳梅香　攝影：黃文成