港股投資者真係可能開心得太早，港股周二大幅反彈202點後，噚日因見美國仍有攻打伊拉克之意，恒指即大幅下挫，一度跌逾300點，差點跌破9400水平，恒指最後收9474，跌233點。一如所料，中國移動（941）及中國聯通（762）繼續成為大戶減磅對象，兩股均挫逾4.3%。
其實香港投資氣氛已有好轉迹象，唔少企業已回復投資信心。好似九倉（004）就話要投資6億於商場及百貨；而華潤超市亦打算用3億幾元開設新分店及翻新舊舖。阿虎唔敢保證呢啲企業嘅投資一定賺錢，但至少反映本港企業覺得成本下調空間有限，及看好未來零售業務前景，先至會如此疏爽。
不過，若美國總統布殊堅持要攻打伊拉克，就真係令人頭痛。霸菱話美國肯定會出兵攻打伊拉克，因而大幅調低本港及區內其他國家嘅經濟增長。
中央最近嚴打逃稅，而且特別針對民企，繼歐亞（932）後，另一隻民企大成生化（809）亦開始有被拋售迹象，噚日股價曾大挫14.7%，低見1.62元，最後收1.75元，成交增至1784萬元。睇個勢，大成股價有可能進一步下挫。
天鷹電腦（1129）宣布中期盈利倒退近70%後，股價一度大跌37.3%，低見0.232元，創上市以來新低，但成交不多，只得128萬元。
黑客話，據聞沽盤主要來自證券行之斬倉盤，有人曾於6月時唱好公司今年業務，準備配股。點知期間唔少上市時幫手圍飛嘅芬佬逐步減持，股價由7毫幾子高位跌落嚟，現時市場上不知幾多蟹貨，加上炒家鳥獸散，相信暫難翻身。
阿 虎