維拉門將安高文對伯明翰嘅經典失球，相信佢一世都冇辦法忘記，而且好可能因為咁令領隊泰萊嬲咗佢，以後都唔再用佢。
我求大俠當然十分同情佢，但係亦好欣賞佢，球迷一定話我黐咗線！其實佢咁樣失手確係爭唔落，只不過失球之後，有十幾個伯明翰球迷開心到走入球場；其中一個重走到安高文面前拍佢塊面幾下，明瘀佢啫，但係佢就好好品，冇話惱羞成怒要向球迷報復，否則就真係大件事嘞！唔好話我求大俠話，好多英超聯球員如果有咁嘅遭遇，早就發晒爛渣好耐，邊有安高文咁忍耐力驚人呀！
據愛華頓方面透露，中國球員李鐵今日生日，但係查實原來佢嘅正式牛一日期係五月十八日至真，呢啲完全係錯在愛華頓，同李鐵本人報錯料無關。講開又講，李鐵喺英超聯嘅表現被球迷肯定，確係中國人之光，佢同時又話已經適應英式足球打法，希望可以長時間留在英超聯，咁有大志，我求大俠一於支持你。
日本中場球星稻本潤一，因為表現大放光芒，已經成為富咸人氣急升得最快嘅人物，據講多咗亞洲球迷（最多係日本女球迷）去睇佢比賽之外，重要搞到球會要用日語張貼禁止入場、拍攝、參觀同要求簽名嘅字句喺訓練場入口處，令我求大俠都要講句：稻本，你係得嘅！
西甲聯拉科阿爺級球員杜尼圖年尾已經四十歲，但係佢依然好恨踢波，可惜季初以嚟佢都冇份上陣，搞到佢冇晒心機，好沮喪，重向教練投訴㖭。計我求大俠話佢真係唔化，因為好多咁嘅年紀嘅球員早已經退休，甚至有啲重細過佢嘅都掛埋靴啦。杜尼圖，希望你自己知自己事啦。
帶領一啲國家隊參加世界盃嘅教練，唔係俾人炒就被迫辭職，但之後都係好霉嘅就唔係太多，韋斯基就做咗人辦。話說由佢帶領嘅比利時標準烈治，聯賽打咗五場輸咗四場，𠵱家包尾，佢老人家俾人炒咗，佢當然十分失望，但係冇法啦，呢個世界，冇表現都咪使旨意生存。