政治市的確難玩，過去幾日艱苦經營的恒指Put輪，在伊拉克突然轉軚無條件接受聯合國武檢後功敗垂成，猶如已上釣的大魚，在除鈎時滑手跌回大海。趙飛雲噚日早市尾段見期指由9568低位回升，不但重上9600，更升破之前高位9660，於是連忙將所有恒指Put輪沽清。
炒恒指輪要睇期指走勢，並非睇現貨。期指噚日早段在9600附近窄幅上落，早市尾段出現向上破位，正是大戶收夠貨準備大幅挾上訊號，午市期指果然大幅挾上，帶動恒指大升202點，收9707。以上大戶手法讀者不妨記存，因準確度相當高。
伊拉克跳慣草裙舞，美國則擺明一定要砌伊拉克，美伊糾紛不會就此完結，但炒輪動輒上落兩三成，就算睇中大趨勢亦無得守。噚日外圍杜指期指大升近200點，杜指周二晚估計會大升，所以趙飛雲對港股後市雖睇淡，但仍要先跳車，稍後可伺機出擊。
技術上，恒指仍受制於5及10日線9728至9752阻力，須升破20日線（現處9964）及企穩其上，方為初步轉勢。若美股周二晚大升，恒指今日有機升穿5及10日線，但短期降軌阻力在9824，須升破才可上試20日線及中期降軌阻力10080。目前策略伺機在上述阻力位買入恒指Put輪，但政治市波動，只宜小注。
趙飛雲