馬主H收到馬會年報，隨意翻閱，發現一啲資料幾有趣。馬會嘅財政年度係七月一日至六月三十日，年結後兩個月，馬會已經印好年報，速度之快，可能係全港數一數二，好多上市公司起碼要在年結後三個月先至可以宣佈業績，冇得同馬會嘅效率比較。
先睇會員數字。截至今年六月三十日止，二百位遴選會員可以每人提名兩人做全費會員、五人做賽馬及其他會員。如果全部用完配額嘅話，馬會每年可以增加四百位全費會員、一千位賽馬會員。但原來每年都冇咁多人入會，以全費會員（fullmember）計，九九年增加二百五十七人，二千年增加三百三十人，○一年增加一百六十六人，○二年減少三人，咦，啲遴選會員好惜身，唔輕易推薦新人入會，唔怪得由今年七月一日起，佢哋只可以推薦一位新人做全費會員，橫掂佢地都用唔晒啲quota咯，減少一半都冇所謂啦，兼且，會大幅增加至二十五萬元，睇怕今個年度，入會做全費會員嘅人更少。至於○一至○二年，點解全費會員人數會減少呢？皆因經濟不景，有人唔交會費或因為其他原因退出馬會。馬會會所個個月都列出一張是月退會名單，一年起碼百零人退會，亦是經濟不景氣年代之象徵。馬主H在名單上曾見過好幾位熟識嘅名字，但係唔好意思打電話去問個究竟，總之家家有本難念的經，無謂打爛沙盆問到篤。