陳曉東隻新碟《從未忘記》上個禮拜尾推出內地版，東東早幾日去咗廣州同佛山開簽名會，見到咁多fans排晒長龍，冒住暴雨等佢，東東都好開心。
不過，東東竟然發現咗幾百隻自己嘅翻版碟，單係《從未忘記》就有八個版本，其中一個版本重收錄埋佢情敵謝霆鋒同陳奕迅合唱嘅新歌《細路》，同埋李克勤嘅《舊歡如夢》㖭，唔知呢隻碟栢芝有冇收藏呢？
東東話：「翻版嘢係咁唔認真，質素又差㗎啦，真係勁唔掂呀，啲碟嘅出品竟然寫係ＥＭＩ唱片、黑龍江環球唱片，重有長春製作廠喎，我都唔知自己過咗檔，亦唔知環球搬咗去黑龍江囉，都唔知好嬲定好笑呀。」
而東東喺廣州嘅簽名會，本來喺大街搞嘅，但因為公安怕群情洶湧，要轉到室內搞。佛山一站，又因為風雨吹塌咗布景板，本來要取消，但東東堅持要做，好彩最後兩站簽名會都順利完成。
任港秀同前東魅藝人楊嘉雯噚日喺中環為新戲《天生買衫狂》開工，套戲內容講一個來自內地嘅女子掙扎求存嘅故事，楊嘉雯飾演嘅章慧重好似影射章小蕙㖭。
而任港秀）扮演嘅Sandy，就有陳曜旻前妻Susanna嘅影子；男演員吳霆同楊澄華就分別做光頭陳同Billy，角色似陳曜旻同鍾鎮濤。楊嘉雯話：「我會同光頭陳有場床戲，點到即止囉。」任港秀就話佢知道Susanna係邊個，佢話：「我喺戲入面係有病，但未知使唔使死。」
早排有個歌手開騷遲咗出場，有傳話因為個髮型師搞頭髮搞到一鑊泡嘅，但馮仁昭聽聞呢其實係女歌手自己要求多多所致。由於佢唔想自己孭鑊，於是就搵女助手放料畀記者，話一切都係嗰位髮型師搞出嚟，嗰位髮型師成為代罪羔羊梗係好㷫，聲明從今以後，都唔會再同嗰位女歌手合作咁話。
陳啟泰代替鍾鎮濤做史雲遜護髮中心嘅新代言人一年，酬勞有六位數字，佢嘅髮線重好似降低咗㖭。陳啟泰話：「佢（鍾鎮濤）做咗兩年，合約已經滿，啲產品周不時都會換人㗎啦，所以唔算搶佢飯碗。」
而中心經理就強調阿B嘅新聞冇影響佢做代言人，之不過公司覺得係時候要轉換藝人，畀公眾了解產品喺唔同人身上嘅效果。
有錢仔做歌手以嚟一直表現好謙虛，以勤力話畀大家聽，佢唔係靠屋企嘅，不過有錢仔始終都係嬌生慣養，點都有啲少爺仔脾氣嘅。
有次佢出席一個有好多歌手參加嘅活動，加上fans、大堆工作人員同保安，迫到個場水洩不通，有錢仔唱完歌想走人之際，竟然一手推開某唱片公司嘅職員，然後對唔住都冇聲就行咗去。有錢仔如果唔改吓，佢點勤力都冇用。
章小蕙成日攞住通街走嘅幾米漫畫小說《向左走向右走》，將會拍成電影同電視，電影版一早講過話由金城武同古天樂拍啦，而台灣電視版最近落實想搵王力宏做男主角，女主角就係舒淇同內地四大名旦之一徐靜蕾。而幾米一聽到話由王力宏做男主角，都覺得佢氣質好啱，舉晒手讚成喎。
顏色小姐本身條件都唔錯，但佢以前真係好鬼麻煩，對於錢銀又好鬼計較，成日喺金錢上搵朋友笨之餘，又當人哋係阿四，所以搞到圈內外好多朋友都遠離佢。
不過最近顏色小姐似乎正常番好多，又靚咗好多，重話嚟緊可能會拍纖體廣告，馮仁昭都希望佢生生性性，唔好再行番以前條路。
無綫明珠台下個月十九號開始，逢星期六播映近年美國好受歡迎嘅電視劇《色慾都市（Sexandthecity）》嘅第一輯。呢套劇嘅賣點係講女性情慾問題，當然唔少得有床上戲同裸露鏡頭啦，但偏偏明珠台因為電視尺度要將呢啲鏡頭全部刪剪。將半小時嘅劇再咁剪法，馮仁昭真係唔知套劇重有啲乜嘢可以畀觀眾睇。