勁改標緻206CC型盡珠海賽車場

繼日前為大家介紹咗，一部喺由TypeRClub假珠海國際賽車場舉辦嘅汽車同樂日中，出現過嘅雷諾ClioCup戰車後，同場亦有一部花費近二十萬去改裝嘅標緻206CC，一樣成為眾人焦點㗎。

ITG吸氣系統增吸風量
大家每日都可以喺街上見到好多大改嘅標緻206，佢哋主要集中外觀或少量引擎改裝；但大家眼前呢部206CC，就由頭到尾都換上Racing補品，當中最吸引就係一套ITG碳纖維吸氣系統。呢套系統除可阻隔引擎室嘅熱氣外，更可導入大量冷風；據一啲外國測試數據顯示，用上ITG碳纖維吸氣系統嘅吸風量，比原裝吸氣系統多出約30%，而且風鼓重有軟喉從車頭泵把導入生風，就算雨天作賽時都唔怕好似其他206咁，向地下吸風而吸入大量水花。

改用高性能制動器
此車用上一套APRacing四活塞制動卡鉗連透氣煞車碟，有別於其他改裝206用上Brembo製品；若要換上呢套制動器的話，首先係要改換17吋胎軨，而呢套制動器亦比原裝一套多出約五成功力，而且耐力驚人，喺三日賽事中都未有出現過熱或制動不良嘅情況。

大幅度改裝引擎部份
由於無正式嘅測試數據，暫時未知確實馬力輸出數值，但估計約為170至180匹；而引擎改裝部份則包括打磨盤頭、吸氣及排氣系統、油冷器、加大水箱、改換全車高壓鋼喉等等。而車尾嘅GT定風翼，更有助改善206車尾嘅被動轉向問題，故此更能表現出其彎路王本色。