近排細價股下跌，幾乎係例牌菜，但聯大集團（346）兩日內勁跌50%，小初就覺得怪怪地。聯大繼前日勁跌40%之後，噚日再插多12.5%，收42仙，但兩日成交金額都極其奀豬，幾乎係乾跌咁滯。
隻股早排股權易手，一位年僅28歲嘅年輕才俊，用咗5660萬元或者每股41.7仙，買咗聯大68%股權，同埋用相同嘅價錢提出全面收購，而收購限期就快到。隻股跌到現時呢個水位，同新買家嘅收購價差唔多。
經紀陳話，聯大上市只不過係1年多，除咗上市初段炒過吓，叫做有啲成交之外，其餘時間就幾乎完全冇郁過，反映街貨真係少之又少，所以今次聯大下跌，可以講話係無指導性。
經紀陳重話，今時今日幾千萬元，其實已經係好多錢，人哋無端端拎咁多錢落嚟買隻殼唔會冇動作。佢到收風，隻股搞掂收購之後就會有動作，現階段各位暫時眼看手勿動。
慕容小初