新地第三代豪宅跑馬地禮頓山入得伙,明日開始交樓,蘭西噚日率先參觀,親身體驗一吓呢個百億豪宅有幾豪。去到之後,諗起兩年前個盤重係爛地一塊,估唔到兩年間,已變成氣派不凡嘅超級豪宅屋苑。香港人辦事效率果然高,同樣規模嘅物業,喺外國可能要十年八載先起好,若然落在偉大的官僚手中,分分鐘重種緊草。
禮頓山九八年招標,由新地以三十六億投得,前年底賣樓花,短時間套現九十億。
為咗慶祝禮頓山聽日交樓,新地邀請王仁曼嘅高足,喺池邊跳芭蕾舞,又請到曾經款待過唔少名人如戴卓爾夫人、克林頓嘅大廚,整咗啲精緻又高級嘅美食招呼新聞界,睇盤之餘感受吓富貴生活。
曾經係熱門話題嘅紅磡超高豪宅海名軒,入伙冇幾耐,錄得第一宗租務成交。二座中層B室,望鯉魚門,千九方呎,以四萬二租出,計埋差餉、管理費同地租,合共五萬多元。
做成呢單租務嘅中原地產,分區經理李玉祥話,傾咗三個禮拜至搞掂。其間租客要求業主出示銀行同意書(最後唔使出示),而兩個月按金,租客就搵銀行做擔保(即唔會直接畀業主)。
呢個業主只係買咗一個單位用嚟收租。市場上放租有成二十幾個,叫租每呎二十七蚊起。
太古地產董事總經理簡基富前日提到,薄扶林數碼港搶咗佢哋鰂魚涌太古坊寫字樓唔少租客,已經走咗嘅涉及1.8萬方呎,噚日太古向蘭西更正,原來條數係8萬呎至真,明年重有8萬呎流失,夾埋一年唔見咗4000萬元,難怪太古咁「㷫」。
為咗配合碧堤半島(英文名Bellagio)嘅意國風情宣傳主題,美聯物業噚日搵咗一男一女,着住瑰麗宮廷禮服,喺美聯碧堤造勢會上唱咗三首意大利情歌。
老實講,佢哋唱啲乜,水準有幾高,蘭西真係唔曉得。但時而婉約悅耳、時而熱情激盪,如行雲流水,不禁神往。
另外,九倉噚日又宣布,聽晚喺碧堤半島現場嘅碧堤坊搞個「碧堤半島~拉斯維加斯之夜」,當晚會有噴火表演、肯肯舞同拉斯維加斯賽局,由九倉做莊。賽事中所有款項都會全部捐畀「香港公益金」。
今個禮拜六係「人月兩團圓」嘅中秋節,大家應早啲歸家做節,但「2002年深圳房地產秋季交易會」就揀咗喺呢日舉行,參展商之一嘅嘉里建設,當日會開介紹會,講解吓福田雅頌居,包括從建築設計、環境設計、工程施工同物業管理等不同層面,相當詳盡。
雅頌居建8幢住宅,共536個單位。
蘭西
電郵地址: