外圍消息指侯賽恩無條件讓聯合國武器調查員重返巴格達，削弱美國攻伊理由，令中東局勢得以緩和，再加上盈富基金（2800）歷史任務快將完成，噚日傳出唔少對沖基金入市平淡倉。
不過，高盛明顯力壓中移動（941），唔知係咪為咗壓低恒指平淡倉呢？據聞因為中電信快將上市，加上港股成交疲弱，所以芬佬要預早減持中移動，準備換馬至中電信。
另外，聯通（762）母公司國內A股上市，勢將部份中資由港股回流至國內，所以中移動與聯通之沽壓可以話係連綿不絕，博反彈真係要諗過先。
港股噚日大升202點，重上9700，但中移動只升0.25％，收報19.70元，成交7.57億元；聯通表現比較好，反彈3%，以5.20元收市，不過母公司國內上市消息對聯通不利，估計反彈過後好快就要調整。
榮盛科技（2974）100合1噚日生效，股價例牌大幅下挫，收報0.228元，急挫77.2%，成交52.59萬元，根本冇人承接。
據聞公司好快就會配股抽水，照計冇理由俾股價跌得咁殘。黑客話，近排二三線股嘅炒家好靜，完全冇做嘢意欲，若公司要配股集資，多數要賤價配售，否則冇人會睬你，而炒家亦唔一定托高股價幫人配售，因為炒高風險愈來愈大。
歐亞農業（932）噚日再跌4.5%，成交增至9112萬元。市場上唔單止傳大戶洗倉，重傳到主席楊斌等錢使，要沽貨套現，情況似乎愈嚟愈失控，博反彈要小心。
不過ｉ師傅話，據聞楊斌已經搵到人接貨，所以噚日股價可以由低位0.56元抽高至0.63元收市。
阿虎