上個禮拜講旺角細舖怕晒班假卡黨，功夫L睇完有回應，佢話其實搞「買取」（即現金回收）啲舖頭都要負部份責任。
功夫L：「旺角兼做買取啲舖頭，好多都唔使登記放貨人資料，連名都唔問，更莫講話身份證或聯絡電話，如果有起事上嚟，其實個舖頭負責人要孭番。」
放貨啫，有啲咩事咁大鑊先？功夫L繼續：「如果啲貨係賊贓，間舖頭就犯咗接贓罪，係刑事罪嚟，非同小可。」
「班假卡黨碌完裏原宿Tee、啤迫返嚟，你估佢哋會攞嚟着或者儲咩？梗係攞去放貨套現，如果放衫褲鞋就去月餅場間裏原宿店，如果放玩具就去豉油街飛碟場，呢兩間舖頭放貨完全唔使登記個人資料。我哋行裏面，如果間舖被人撻咗嘢，轉頭落去一定搵得返，有時連價錢牌都未搣，旺角區真係目無法紀。」
功夫L透露，原來近半年最受假卡黨歡迎嘅貨係「拾篇」BoxTee，佢誇言每賣出十件BoxTee，其中五件就係被假卡黨買咗。轉頭被另一間買取舖接贓，點知又被第二班假卡黨「擸」咗，再放貨套現，如此循環，唔怪得啲嘢愈炒愈貴。
主持人：大食Jack
八卦熱報：