示威專家「四五行動」噚日又去政府總部示威，抗議《基本法》二十三條立法扼殺言論自由。佢哋被擋在老遠嘅停車場鐵閘外，長毛呢個示威老手，重差啲燒親！
話說長毛計劃焚燒《基本法》以示抗議，正所謂燒慣燒熟，點知到正式埋位時，本《基本法》竟然燒唔着！燒到個打火機變形都起唔到火，卒之要換另一個打火機，繼續，好耐先見到火光。
咁都未算邪，長毛佢哋跟住想燒江總、阿董、葉劉同梁愛詩四個人嘅大頭相，批判佢哋四個人打算「小眾立法」，點知花一大輪工夫都未掂，最後要落手落腳撕爛張相。長毛承認出乎意料，原來佢噚日搵咗本政府印製嘅《基本法》，非常精美，封面好似過咗膠，防水又防火。至於江總、阿董等人嘅相，估計係因為落大雨潮濕，所以「冇晒火氣」。
原來《基本法》有好多版本，偏偏長毛揀着本「防火」嘅。唔知特區政府係咪有心咁樣設計，以宣示《基本法》水火不侵？
傳真︰2623-9278
電郵︰