馬時亨唔道歉，俾人鬧餐死；佢出嚟道歉，又俾人鬧餐死，你話道歉好抑或唔道歉好？道歉亦講功夫嘅，一要有誠意，二要夠快速（唔好拖時間），三要道歉者有份量（唔係搵個二打六出嚟道歉），四要講究道歉方法、環境、受眾。中馬哥（佢年紀唔細，但未至老）嘅道歉就犯齊各樣錯誤，佢自己、佢嘅馬仔，以至新聞處，都要負責。不過大編輯就話：「蔡瑩璧好似事前唔知道只會招呼電子傳媒喎。」唔知道，冇睇文件，等於唔使負責，好唔啱聽啫。
大編輯睇布殊紐約演講，講台前後都唔打燈，射燈照亮布殊背後嘅自由神像，影像感覺非常強烈，令布殊反恐言論嘅可信性大增。大編輯有感而發：「美國佬搞公關形象，真係掂，布殊演講嘅場地佈置極簡單，以自由神像為背景就殺晒，佢啲公關人員，真高手也。令我聯想到，假如馬時亨在十點開市前，到港交所大堂中央發表談話兩分鐘，講番一兩句甚麼吸取教訓、以後加強溝通、調查委員會雖然認為本人冇過失，但身為乜乜局長，本人甚表歉意諸如此類，搵高人寫稿，講得好好睇睇，然後在大堂向所有出市代表鞠躬，全港記者在場影相拍攝，呢個形象包保傳遍全球，攞晒分！」左丁山話：「唔怕出市代表擲番茄咩？」大編輯話：「重好，一來大家消消氣，之後就冇氣；二來一定惹部份人士同情，鬧出市代表冇禮貌，可以轉移視線！」