太古地產董事總經理簡基富噚日向外界表示，數碼港以低租金搶走佢哋不少寫字樓客。佢話，官與民爭！先有居屋同私樓競爭，後有得政府資助嘅數碼港搶寫字樓客，真係好可悲。再係咁，重有乜嘢吸引太古投資香港。太古最唔想同政府爭。
一年前，佢話過數碼港對佢哋影響唔大，𠵱家就改口，原來係有萬八呎樓面嘅租客，約滿後轉投數碼港，明年又多兩個大租客走，樓面有成八萬呎。唔怪得佢咁睇唔好寫字樓市道啦。
講起數碼港，當年政府批畀盈科（𠵱家嘅電盈）時，曾惹來各界猛烈抨擊，包括太古、新世界、新地、鷹君、置地、恒基及希慎等七大發展商，並且喺99年聯手，商討如何迫使政府將數碼港重新招標。其後又約見政務司司長及財政司司長表達不滿數碼港發展計劃。
吉林省長春市長春天安第一城開售，發展商香港天安（中國）就請嚟影星任達華做嘉賓，出席開盤儀式。點解搵明星？無他，因為世界各地一樣，對明星或偶像有崇拜心理，發展商請到明星到場，證明自己有身份有面子。
其實搵明星為樓盤賣廣告例子唔少，由上海豪宅到東莞同深圳樓盤都有；最令人印象深刻，當然係汪阿姐為東莞樓盤賣嘅廣告。
個別樓盤，則搵自己人賣廣告，早前內地名導演張藝謀，都有為上海太陽都市花園賣廣告。
喺前年年底，以第三代豪宅作招徠嘅跑馬地豪宅禮頓山，終於落成準備交樓。呢個當日令買家瘋狂嘅豪宅盤，兩年後嘅今日，發展商仍然唔放過宣傳招牌傑作嘅機會，今日招待傳媒參觀物業嘅會所「禮頓會」、頂層相連單位同標準單位。據悉新地副主席郭炳江周日已到場視察過。
新地畀傳媒隨意揀單位嚟睇，證明對自己嘅產品好有信心。
禮頓山當年開賣時曾引起全港哄動，發展商短時間沽清所有單位，收咗90億元，創出紀錄。
寫字樓小業主為咗盡快出貨，通常都係用重賞方法，鼓勵代理盡快搵買家。聽講最近有一個寫字樓單位，業主出到4個佣，但最後都要自己出馬先賣出個單位。
原來呢個都唔係最經典嘅紀錄，曾有業主最高畀到5個佣。
八月份登記嘅私人住宅樓花按揭合約只有五百七十幾宗，比七月少近六成，喺七月上市嘅中銀就做咗百六宗，比例最大。中原地產話，樓花按揭宗數大減，係世界盃後遺症，發展商唔開新盤，淨係賣貨尾。
至於工商舖住宅同其他樓宇按揭合約，就有八千七百宗，比七月跌兩成，中銀同樣承造最多按揭，有二千三宗。中銀有一段時間喺樓按市場都係處於一哥地位。第二位就係近年積極搶佔樓按業務嘅渣打銀行。滙豐銀行就得個季軍。
喺趙國雄全面進攻式賣樓策略下，長實賣樓愈嚟愈爛打爛砌。以前搵置業精英踩人哋場，𠵱家又喺人哋嗰盤附近，租舖位長駐，聽講會開四間。
第一間就衝着九龍倉碧堤半島而來，喺麗都花園租咗個400幾呎嘅舖，𠵱家密鑼緊鼓咁裝修。蘭西根據長實提供嘅資料，喺深井多方查證，發覺圖中呢個舖位，最有可能就係長實所講嘅指揮中心嘞。
另外，噚日揀凱帆軒內購單位的100個買家，獲長實贈送價值1.8萬蚊嘅SONY電腦一部。長實又計劃緊第日會喺網上揀樓，令買家免卻舟車勞頓之苦。
地鐵將軍澳支線通車，對區內樓市確實帶來支持。太古同新地合作嘅維景灣畔，係第一個有搞作嘅樓盤，雖然發展商冇喺8月通車之後即時推盤，但事前都做咗好多宣傳工夫，就係包起地鐵北角站往將軍澳方向月台嘅全部燈箱廣告。
蘭西得悉，呢批廣告燈箱共30個，不論車頭到車尾，乘客等車時全部都會望到，話唔定有部份乘客睇廣告後，即時去調景嶺站落車睇樓，咁就可以做到生意。太古一向有租用地鐵嘅廣告燈箱，不過今次應該係最重手嘅一次。
蘭西
電郵地址：